வீரப்பன் பிடியில் பதினான்கு நாட்கள், கிருபாகர், சேனானி, கன்னடத்திலிருந்து தமிழில்-பா. வண்ணன், காலச்சுவடு பதிப்பகம், விலை ரூ.175.

To buy this Tamil book online: https://www.nhm.in/shop/100-00-0002-195-7.html

பீடி, சிகரெட்டெல்லாம் ஆரோக்கியத்துக்கு நல்லதில்லை. அநத்ப் பழக்கத்தையெல்லாம் விடறதுக்கு இது நல்ல நேரம் என்றாள் அவன். அவனுடைய உபதேசத்தை என்னால் ஏற்றுக் கொள்ள முடியவில்லை.

நீ ஒரு வேலை செய். தினம் ஒரு வேளை சாப்பாட்டை வேணும்னாலும் நிறுத்து. கவலை இல்லை. ஆனால் பீடி மட்டும் கண்டிப்பா வேணும் என்று வற்புறுத்தினேன். இந்த உரையாடல் நடந்த இடம் கர்நாடகாவில் உள்ள பந்திப்பூர் காடு. இதை எழுதியிருப்பவர் கிருபாகர் என்ற புகைப்படக்காரர்.

இவரும் இவருடைய கூட்டாளியான சேனானியும், வீரப்பனால் கடத்தப்பட்டு காட்டில் வைக்கப்பட்டபோது நடந்த உரையாடல் இது. தன்னுடைய உயிர் எந்த நேரத்தில் பறிக்கப்படுமோ என்ற அச்சத்தில் இருந்த கிருபாகருக்கு வீரப்பன் செய்த உபதேசம்தான் மேலே சொல்லப்பட்டது.

வீரப்பன் சுட்டுக் கொல்லப்பட்டு பல்லாண்டுகள் ஆன பிறகும் வீரப்பன் சம்பந்தப்பட்ட தகவல்களுக்கு மவுசு இருக்கிறது. கற்பனைகளுக்கும் கிராக்கி இருக்கிறது. இரண்டு புகைப்படக்காரர்களும் வீரப்பனிடம் கைதியாவதில் தொடங்கி, விடுதலை செய்யப்பட்டு வீடு வந்து சேர்வது வரை பதினான்கு நாட்கள்.

இந்தப் பதினான்கு நாட்களின் பரிதவிப்பை, மிரட்சியை, கல்க்கத்தை, பசியை, ஆர்வத்தை, பதிவாகக் கொடுக்கிறது இந்தப் புத்தகம். நம்புவதற்கு சிரமமாக இருந்தாலும் இதில் நகைச்சுவையும் இருக்கிறது. மனிதர்கள் அதிகம் புழங்காத அந்தக் காட்டுப்புரத்தின் கதகதப்பை, அரவணைப்பை ரசித்ததோடு மட்டுமல்லாமல் அதை வர்ணனையாய் நமக்கும் கொடுத்திருக்கிறார்கள் இந்தப் பயணக் கைதிகள்.

வீரப்பன் பிடியில் சிக்கி உள்ளே இருந்தவர்கள் வெளியே வந்துவிட்டதால் இந்த வர்ணனையை நம்மால் படிக்க முடிகிறது.

நன்றி: கல்கி, 2/3/2014.

—-

சேக்கிழார் பிள்ளைத்தமிழ், பூம்புகார் பதிப்பகம், 127, பிரகாசம் சாலை, சென்னை 108, விலை 580ரூ.

To buy this Tamil book online: https://www.nhm.in/shop/100-00-0001-789-8.html

சேக்கிழார் பிள்ளைத் தமிழ், புகழ்பெற்ற இலக்கிய நூல். வித்துவான் பாலுர் கண்ணப்ப முதலியார் எழுதிய மூலமும் உரையும், நீண்ட இடைவெளிக்குப் பின், சிறந்த கட்டமைப்புடன் வெளிவந்துள்ளது.

நன்றி: தினத்தந்தி, 26/2/2014.

இந்தியாவில் முஸ்லிம் ஆட்சி (இரு பகுதிகள்), சையித் இப்ராஹிம், எம்.ஏ., எல்.டி., யுனியவர்ஸல் பப்ளிஷர்ஸ், 2, வடக்கு உஸ்மான் சாலை, தி.நகர், சென்னை 17, விலை-முதல் பகுதி ரூ. 190, இரண்டாம் பகுதி-ரூ. 225.

இந்நூலாசிரியர், கி.பி. 695ல் முஹம்மத் பின் காஸிம் என்பவர் இந்தியாவிற்குப் படையெடுத்து வந்தது முதல், கி.பி. 1859ல் கடைசி மன்னர் பஹதுர்ஷா ஆண்டது வரையிலான அனைத்து முஸ்லிம் மன்னர்களையும், அவர்களது ஆட்சி முறைகளையும் பற்றி இரண்டு நூல்களில் சுருக்கமாகத் தொகுத்துள்ளார்.

அரேபியால் இஸ்லாம் தோன்றுவதற்கு முன்பே இந்தியாவுடன் அந்நாட்டுக்கு இருந்த வியாபாரத் தொடர்பு தொடங்கி, அந்த காலகட்டத்தில் இந்தியாவில் இருந்த சைவ, வைணவ, புத்த, ஜைன, யூத, கிறிஸ்தவ மற்றும் பார்ஸி மதங்களுக்கு இடையே இருந்த போட்டிகள், ஆதிசங்கரரின் சைவ மதப் பிரசாரம் போன்றவையும் இந்நூலின் ஆரம்ப அத்தியாயங்களில் கூறப்பட்டுள்ளன.

அதைத் தொடர்ந்து முஸ்லிம் மன்னர்களின் ஆட்சி இங்கு எப்படி வந்தது, அவர்களில் யார் யாருடைய ஆட்சி மக்களுக்கு நன்மையையும், தீமையையும் விளைவித்தன. இங்கே இஸ்லாம் பரவியதற்கும், இம்மன்ரகளுக்கும் சம்பந்தம் உண்டா? முஸ்லிம் மன்னர்களின் ஆட்சி முறையால் பல்வேறு துறைகளில் இந்தியா கண்ட வளர்ச்சி, இந்தியாவில் இஸ்லாம் பரவியது எப்படி, இஸ்லாமிய சூஃபி ஞானிகள் ஹிந்துக்களுடன் எப்படி ஒருங்கிணைந்து சென்றனர் என்று பல விவரங்களை தக்க சான்றுகளுடனும், புள்ளி விபரங்களுடனும் இந்நூலாசிரியர் இவ்விரு நூல்களிலும் பதிவு செய்துள்ளார்.

சிறந்த வரலாற்றுப் பெட்டகங்களில் இவையும் ஒன்று.

-பரக்கத்.

நன்றி: துக்ளக், 29/1/2014.

—-

போளூர் பொக்கிஷம், ஸ்ரீதேவி பச்சையப்பன் பப்ளிகேஷன்ஸ், 38, அங்காளபரமேஸ்வரி தெரு, போளூர் 606803, விலை 499ரூ.

திருவண்ணாமலை மாவட்டம், போளூர் வட்ட வரலாறு குறித்த ஆய்வுத் தொகுப்பு நூல். இம்மாவட்டம் குறித்து இதுவரை வெளிவந்துள்ள அனைத்து ஆராய்ச்சி நூல்கள், வெளியீடுகள், கல்வெட்டுகள் மற்றும் இதர தரவுகள் அனைத்தும் நன்கு ஆராயப்பட்டும், கள ஆய்வுகள் நடத்தியும் சிறந்த வரலாற்றுக் காவியமாக ஆவணப்படுத்தியுள்ளார் நூலாசிரியர் தீபக் (எ) தேவஜெயன்.

போளூர் வட்டத்தின் அரசியல் பொருளாதாரம், மக்கள் வாழ்க்கை, பண்பாடு, சைவ வைணவத் தலங்கள், மகான்கள், சித்தர்கள், கலை, இயற்கை வளம், விவசாயம், மலைவாழ் மக்களின் சமூக பொருளாதார நிலைகள், கல்வி, உள்ளாட்சி அமைப்புகள் போன்ற அனைத்து விவரங்களும் கவனத்துடன் திரட்டப்பட்டு, பதிவு செய்யப்பட்டுள்ளது.

நாட்டின் வரலாறு மாவட்டத்தின் வரலாறு என்ற நிலைக்கு கீழ் ஓர் ஊரின் வரலாறு, நுண் வரலாற்று ஆய்வு ஆகும். இவ்வரலாற்றுத் தொகுப்பு மாவட்டக் கையேடு என்ற தகுதியைப் பெற்று ஆராய்ச்சியாளர்களுக்கும், மாணவர்களக்கும், மாவட்ட நிர்வாகத்தினருக்கும் மற்றும் பொதுமக்களுக்கும் நன்கு பயன்படும் என்பதில் ஐயமில்லை.

நன்றி: தினத்தந்தி, 26/2/2014.

கச்சத்தீவு, ஆர். முத்துக்குமார், சிக்ஸ்த்சென்ஸ் பப்ளிகேஷன்ஸ், 10/2, (8/2) , போலீஸ் குவாட்டர்ஸ் சாலை, தியாகராயநகர், சென்னை 17, விலை 100ரூ.

மீனவர்களின் தன்னுரிமைப் போராட்டம்

To buy this Tamil book online: https://www.nhm.in/shop/100-00-0001-266-6.html

1974ல் இந்திரா காந்தி சிறிமாவோ பண்டாரநாயக ஒப்பந்தம் மூலம் முந்நூறு ஏக்கர் நிலப்பரப்பைப் பெற்றுக்கொண்டது இலங்கை. கச்சத்தீவு சந்தேகமில்லாமல் இந்தியாவின் ஒருபகுதியாக இருந்ததுதான் என்று வரலாற்று ரீதியான ஆதாரங்களுடன் கூறும் புத்தகம் ஆர். முத்துக்குமார் எழுதிய, கச்சத்தீவு தமிழக மீனவர்களின் தன்னுரிமைப் போராட்டம். ஆசிரியருக்கு இந்திய அரசியல், குறிப்பாகத் தமிழக அரசியல், திராவிட இயக்கங்கள் குறித்த ஆய்வும் புதிதல்ல.

அதற்கு இவர் எழுதியிருக்கும் தமிழக அரசியல் வரலாறு, திராவிட இயக்கங்கள் வரலாறு ஆகிய நூல்களே சான்றுகள். தமிழகத்தையும், தமிழ்வாசகர்களையும் தாண்டி இந்தப் புத்தகத்தின் வீச்சு இருக்கவும், சம்பந்தப்பட்டவர்களைச் சென்றடையவும் வேண்டுமெனில் இது ஆங்கிலத்தில் மொழி பெயர்க்கப்பட வேண்டும்.

கச்சத்தீவு விவகாரம் பற்றி முழுமையாகத் தெரிந்து கொள்வதில் ஆர்வமுள்ள அனைவரும் படிக்க வேண்டிய நூல் இது.

நன்றி: தி இந்து, 12/3/2014.

—-

108 திருப்பதிகள் (பாகம் 3,4), ப்ரியா கல்யாணராமன், குமுதம் பு(து)த்தகம், 306, புரசைவாக்கம் நெடுஞ்சாலை, சென்னை 10, பக். 136+ 160, விலை 155ரூ, 175ரூ.

108 திருப்பதிகளுக்கும் சென்று சேவிக்க இயலாதவர்கள் ப்ரியா கல்யாணராமனின் 108 திருப்பதிகள் நூல்களைப் படித்தாலே போதும். அந்த திவ்ய தேசங்களுக்கு சென்று வந்த உணர்வைப் பெறலாம்.

108 திருப்பதிகள் எங்கெங்கே இருக்கின்றன? அவற்றின் பெயர்க்காரணம், தல வரலாறு, தல சிறப்பு, புராண சரித்திர நிகழ்வுகள், ஞானிகள், அவதார புருஷர்கள் பற்றிய செய்திகள், கோயில்கள் தொடர்பான நூல்கள், நூலை அருளிய ஆசிரியர்கள், பக்தர்கள் அடைந்த பயன்கள் என்று ஒன்றுவிடாமல் பதிவு செய்திருக்கிறார் நூலாசிரியர்.

மொத்தத்தில் அள்ள அள்ள வற்றாத அட்சய பாத்திரம்போல் வருகிறது. 108 திருப்பதிகள் பற்றிய செய்திகளும் தரிசனங்களும் வரலாறுகளும்.

நன்றி: குமுதம், 19/3/2014.

கிராமத்து ராட்டினம், ஜி. மீனாட்சி, நியூ செஞ்சுரி புக் ஹவுஸ் (பி) லிட், 41 பி, சிட்கோ இண்டஸ்டிரியல் எஸ்டேட், அம்பத்தூர், சென்னை 98, பக். 118.

சமகாலப் பிரச்சினைகளின் கலை வடிவம்

சிறுகதைகள் அருகிவரும் சூழலில் ஜி. மீனாட்சி பெயரைப் புதிதாக அறிய நேர்த்து. நல்ல தமிழில் எழுதியிருப்பது மகிழ்ச்சி தருகிறது. கதைச் கருக்கள் எளிமையானவை. மிக நுட்பமான விஷயங்களைப் பேச அவ்வளவாக சிரமமற்ற சம்பவங்களை அவர் தேர்ந்திருப்பது ஆச்சரியம் தருகிறது.

மாறியிருக்கிற சமூகச் சூழல் நம்மிடம் விட்டுச் செல்லும் பிரச்சினைகளைத் தகுந்த கோணத்தில் படைப்புகளாக்கியுள்ளார். கதைகள் முதலில் சம்பவ அடுக்குகளாக அமைகின்றன.

கதை இன்ன விஷயத்தில்தான் இயங்குகிறது என்பதை அந்தச் சம்பவங்களின் ஊடாக முதலில் அறிய முடியவில்லை. சடைசிக் கட்டத்தில்தான் முடிச்சு அவிழ்கிறது. கதையின் கட்டுமானத்தை அதன் பிறகு சரியென்று நாம் ஒப்புக்கொள்கிறோம்.

தெளிவற்ற பாவனையில் இயங்கி ஒரு தெளிவைத் தருவதும் புதிய பாணியாகும். இது ஒருவகையான படைப்புத் தந்திரம். அவளுக்கென்று ஓர் மனம், கிராமத்து ராட்டினம் போன்ற கதைகள் இதற்கு எடுத்துக்காட்டுகள். கிராமத்து ராட்டினம் கதை நெடும்போக்காக வந்து இறுதியில் நகர கிராம வாழ்க்கையின் ஒப்பீடாகிறது.

அது நுட்பமான மன இயல்புகளை எடுத்துரைப்பதால் கதையுடன் நாம் ஒன்றுகிறோம். இதன் மறுபக்கம் என்னவெனில் பாத்திர வகைமைகளைக் கவனத்தல் எடுத்துக்கொள்ளமலிருப்பது. ஆனால் சொல்லவரும் நேரடித் தன்மைக்குள் கதை பயணமாகும்போது அந்தக் குறை நேர்வதில்லை.

சிறகொடிந்த பறவைகள் கதை இதற்கு நல்ல உதாரணம். நாகரிகச் சமூகம் பெற வேண்டிய உயரிய பண்புகளை, அந்த நாகரிகச் சமூகத்தின் கல்வி முறையே அழித்தது எப்படி சின்னாபின்னப்படுத்துகிறது என்பதை ஒரு குடும்பத்தின் அன்றாடச் சம்பவங்களில் காட்டுகிறார்.

மதிப்பெண்களைக் குறிவைத்து மாணவப் பருவம் இயந்திரமயமாக்கப்படுவதைப் பிரச்சாரத் தன்மையில்லாமல் உணரவைக்கிறார். தாய் மனசு, காக்கைக்கும் தன்குஞ்சு கதைகள் இரண்டும் உளவியல் ரீதியானவை, அவரவர் மனநிலையைப் பிரதிபலிப்பதில் இன்னும் கொஞ்சம் கவனம் வைத்துச் செதுக்கியிருந்தால் சிறப்பாக இருந்திருக்கும்.

நவீன காலத்தின் பிரச்சினைகளைக் கூர்ந்து கவனித்து அதற்குரிய கலை வடிவத்தை வழங்கியிருப்பதில் ஜி.மீனாட்சி கவனத்திற்குரிய இடத்தைப் பெற்றிருக்கிறார்.

நன்றி: தி இந்து, 12/3/2014.

—-

மாசறு அகலிகை, முல்லை பி. எஸ். முத்தையா(பதிப்பாசிரியர்), முல்லை பதிப்பகம், 323/10, கதிரவன் காலனி, அண்ணாநகர், மேற்கு, சென்னை 40, பக். 192, விலை 100ரூ.

ராமாயணத்திலும் பாரதத்திலும் வரும் கிளைக்கதைகளில் ஒன்றாகிய அகலிகையின் கதையை, தமிழ் எழுத்தாளர்கள் பலர் பல்வேறு கோணங்களில் அலசியுள்ளார். ராஜாஜி, புதுமைப்பித்தன், கம்பதாசன், சிட்டி, எம்.வி.வெங்கட்ராம், க. கைலாசபதி உள்ளிட்ட 19 அறிஞர்கள் புதிய கண்ணோட்டத்தில் அகலிகையைப் பார்த்திருக்கிறார்கள்.

அவற்றை ஒருசேர பருகும் வாய்ப்பு இந்நூலில் கிட்டுகிறது. படிக்கப் படிக்க அகலிகை பற்றிய படிமம் நம்முன் புதுவிதமாக காட்சிப்படுத்தப்படுகிறது. நல்ல முயற்சி.

நன்றி: குமுதம், 19/3/2014,

வெற்றிக்கனி, மா. முருகப்பன், கலா கருணா பப்ளிகேஷன்ஸ், 11, முதல் தெரு, பக்தவத்சலம் நகர், அடையாறு, சென்னை 20, பக். 370, விலை 75ரூ.

புதினம் அல்ல அறிவுநூல்.

ஆசிரியர் மா. முருகப்பனால் எழுதப்பட்ட இந்நூல் பலரது உதவியுடன் வடிவமைக்கப்பட்டது. இந்நூலில் கதையுடன் பல விளக்கப் படங்களும் உள்ளன. ஆசிரியர் எம்.பி.ஏ., எம்.எஸ்சி., பட்டம் பெற்றவர்.

அவரது அறிவை நாவல் முழுவதும் உணரலாம். குமரன், பிரியா, மனோஜ், ருக்காணி, பூங்கொடி ஆகிய கதாபாத்திரங்கள் நாவலில் முதன்மை பெறுகின்றன. நவீனக் கல்வி மையம் தமது கோட்பாட்டிற்கு ஏற்ப அமைவதே இறுதி முடிவாகும்.

ஆயினும் நூல் முழுவதும் பால்டர், சத்யஜித் ராய், கணித மேதை இராமானுஜம், பெர்னாட் ஷா போன்ற அறிஞர் கூற்றுகள் ஆங்காங்கே குறிப்பிடப்பட்டுள்ளன. 57 அத்தியாயங்கள் கொண்ட இந்நூல் விரைவாகப் படிக்கத்தக்கதாக அமைக்கப்பட்டுள்ளது.

இந்நூல் ஒரு புதினம் அல்ல. அறிவுநூலாகும். சமுதாய மேம்பாட்டுக்கான, நடைமுறைத் தத்துவம் கொண்டது என முன்னுரையில் காதர்பாட்சா கூறுகிறார். நூலின் கருத்துக்களின் அடிப்படை நோக்கம் பலன் விளைவிப்பது, அதன் தொடர் எண்ணம் வார்த்தை புரிதல் இலக்கண பலம் என ஆசிரியர் விவரிக்கிறார்.

நன்றியும் வணக்கமும் கூறும் ஆசிரியர் 30 கூற்றுகளில் நூலாக்கத்தை முன்னுரையில் அறிவுறுத்துகிறார்.

நன்றி: தி இந்து, 12/3/2014.

—-

திரைக்கதை ஒரு கண்ணோட்டம், தர்மா, A.D.N. பப்ளிகேஷன்ஸ், 44, 5வது சந்து, 3வது பிளாக், தாஸப்பா லேஅவுட், ராமமூர்த்தி நகர், பெங்களூரு, பக். 312, விலை 150ரூ.

ஒரு கதை அதற்கான ட்ரீட்மெண்டுடன் படம் பிடிக்கப்பட்டு, திரையில் காட்டுவதற்காக எழுதப்படுவதைத்தான் திரைக்கதை என்கிறார்கள். அந்தத் திரைக்கதையை எப்படி எழுதுவது என்பதை அனுபவரீதியாக கற்றுத்தரும் நூல் இது.

திரைக்கதை என்றால் என்ன? ஒரு கதைக்குத் தகுந்த கதாபாத்திரத்தை எவ்வாறு உருவாக்குவது? வசனம், காட்சி, கதையின் முக்கிய அம்சங்கள், தொழில்நுடப உத்திகள் பற்றிய விளக்கத்துடன் எளிமையாக படைத்திருக்கிறார்.

புதிதாக சினிமாவில் திரைக்கதை எழுதத் தொடங்குபவர்களுக்கு இந்நூல் உதவக்கூடும்.

நன்றி: குமுதம், 19/3/2014
வெற்றிக்கனி, மா. முருகப்பன், கலா கருணா பப்ளிகேஷன்ஸ், 11,

முதல் தெரு, பக்தவத்சலம் நகர், அடையாறு, சென்னை 20, பக். 370,

விலை 75ரூ.
புதினம் அல்ல அறிவுநூல்.
ஆசிரியர் மா. முருகப்பனால் எழுதப்பட்ட இந்நூல் பலரது

உதவியுடன் வடிவமைக்கப்பட்டது. இந்நூலில் கதையுடன் பல

விளக்கப் படங்களும் உள்ளன. ஆசிரியர் எம்.பி.ஏ., எம்.எஸ்சி., பட்டம்

பெற்றவர். அவரது அறிவை நாவல் முழுவதும் உணரலாம். குமரன்,

பிரியா, மனோஜ், ருக்காணி, பூங்கொடி ஆகிய கதாபாத்திரங்கள்

நாவலில் முதன்மை பெறுகின்றன. நவீனக் கல்வி மையம் தமது

கோட்பாட்டிற்கு ஏற்ப அமைவதே இறுதி முடிவாகும். ஆயினும் நூல்

முழுவதும் பால்டர், சத்யஜித் ராய், கணித மேதை இராமானுஜம்,

பெர்னாட் ஷா போன்ற அறிஞர் கூற்றுகள் ஆங்காங்கே

குறிப்பிடப்பட்டுள்ளன. 57 அத்தியாயங்கள் கொண்ட இந்நூல்

விரைவாகப் படிக்கத்தக்கதாக அமைக்கப்பட்டுள்ளது. இந்நூல் ஒரு

புதினம் அல்ல. அறிவுநூலாகும். சமுதாய மேம்பாட்டுக்கான,

நடைமுறைத் தத்துவம் கொண்டது என முன்னுரையில் காதர்பாட்சா

கூறுகிறார். நூலின் கருத்துக்களின் அடிப்படை நோக்கம் பலன்

விளைவிப்பது, அதன் தொடர் எண்ணம் வார்த்தை புரிதல் இலக்கண பலம் என ஆசிரியர் விவரிக்கிறார். நன்றியும் வணக்கமும் கூறும் ஆசிரியர் 30 கூற்றுகளில் நூலாக்கத்தை முன்னுரையில் அறிவுறுத்துகிறார்.
நன்றி: தி இந்து, 12/3/2014.

திரைக்கதை ஒரு கண்ணோட்டம், தர்மா, A.D.N. பப்ளிகேஷன்ஸ், 44,

5வது சந்து, 3வது பிளாக், தாஸப்பா லேஅவுட், ராமமூர்த்தி நகர்,

பெங்களூரு, பக். 312, விலை 150ரூ.
ஒரு கதை அதற்கான ட்ரீட்மெண்டுடன் படம் பிடிக்கப்பட்டு,

திரையில் காட்டுவதற்காக எழுதப்படுவதைத்தான் திரைக்கதை

என்கிறார்கள். அந்தத் திரைக்கதையை எப்படி எழுதுவது என்பதை

அனுபவரீதியாக கற்றுத்தரும் நூல் இது. திரைக்கதை என்றால்

என்ன? ஒரு கதைக்குத் தகுந்த கதாபாத்திரத்தை எவ்வாறு

உருவாக்குவது? வசனம், காட்சி, கதையின் முக்கிய அம்சங்கள்,

தொழில்நுடப உத்திகள் பற்றிய விளக்கத்துடன் எளிமையாக

படைத்திருக்கிறார். புதிதாக சினிமாவில் திரைக்கதை எழுதத்

தொடங்குபவர்களுக்கு இந்நூல் உதவக்கூடும்.
நன்றி: குமுதம், 19/3/2014

அடிமையின் காதல், ரா.கி. ரங்கராஜன், அல்லயன்ஸ் கம்பெனி, 244, ராமகிருஷ்ணா மடம் சாலை, மயிலாப்பூர், சென்னை 4, பக். 456, விலை 205ரூ.

எழுத்துலகில் பன்முகம் கொண்ட ரா.கி.ரங்கராஜனின் இன்னொரு அவதாரம்தான் இந்த சரித்திர நாவல். வெள்ளைக்காரன் சென்னையில் குடியேறிய காலத்துப் பின்னணியில் எழுதப்பட்ட நாவல்.

இந்திய ஆங்கிலேயே உறவின் பதிவே ஒரு சரித்திரமாக விரிகிறது. சென்னை நகரில் நடந்த அடிமை வியாபாரம்தான் நாவலின் அடிநாதம். நம்முடைய சென்னை இப்படியும் இருந்ததா என கேட்க வைக்கிறது. சென்னை பட்டணத்தில் வெள்ளைக்காரனுக்கும் நமக்குமான ஒரு வாழ்வியல் நேசம் சிலிர்க்க வைக்கிறது.

நன்றி: குமுதம், 19/3/2014.

—-

முடிசூடா ராணிகள், இ.எஸ். லலிதாமதி, ஆர்.எஸ்.பி. பப்ளிகேஷன்ஸ், 106/4, ஜானி ஜான்கான் சாலை, ராயப்பேட்டை, சென்னை 14, விலை 60ரூ.

நம் நாட்டில் குறிப்பாக தமிழ்நாடு மற்றும் உலகம் முழுவதும் நாடுகளை ஆட்சி செய்த அரசிகள், அரசர்களின் பின்புலமாக இருந்துள்ளனர். இவர்களை பற்றி தெரிந்துகொள்வதற்காக, கோப்பெரும் பெண்டு, அங்கவை, சங்கவை, செம்பியன் மாதேவி, பெண்ணரசி பேசும் ரசியா போன்ற ராணிகள் உட்பட பல்வேறு ராணிகளின் வாழ்க்கை வரலாறு புத்தகமாக வடிக்கப்பட்டுள்ளது.

ராஜாதி ராஜ, ராஜ கம்பீர என்ற வாழ்த்தொலி ராஜாக்களுக்கு மட்டுமல்லாது ராணிகளுக்கும் சொந்தமானது என்பதையும் நூல் மூலம் அறிய முடிகிறது.

நன்றி: தினத்தந்தி, 12/3/2014.

பாரதி வசந்தனின் சங்கு புஷ்பங்கள், மெட்ராஸ் பழனியப்பா பிரதர்ஸ், கோனார் மாளிகை, 25, பீட்டர்ஸ் சாலை, சென்னை 14, விலை 135ரூ.

புதுவை தந்த சிறந்த எழுத்தாளரான பாரதி வசந்தனின் சிறுகதைத் தொகுதி சங்கு புஷ்பங்கள். இதில் 20 சிறுகதைகள் அடங்கியுள்ளன. ஒவ்வொரு கதையும் ஒருவிதம்.

சமுதாய அவலங்கள், அரசியல் அநீதிகள், ஏழை பணக்காரன் வேறுபாடு இப்படி பல்வேறு பிரச்சினைகளையும் அலசி இருக்கிறார். தலைப்புக் கதையான சங்கு புஷ்பங்கள் உணர்ச்சிமயமானது. இளைய தலைமுறையினர் இக்கதைகளைப் படித்தால், சிந்தனையைத் தூண்டும் இளம் எழுத்தாளர்கள் படித்தால், சிறந்த சிறுகதைகளைப் படைக்கக்கூடிய உத்திகளை அறிந்துகொள்ளலாம்.

நன்றி: தினத்தந்தி, 12/3/2014.

—-

தமிழ் இலக்கிய வரலாறு, சி. பாலசுப்ரமணியன், செண்பகா பதிப்பகம், சென்னை 17, பக். 280, விலை 99ரூ.

To buy this Tamil book online: https://www.nhm.in/shop/100-00-0002-175-0.html

செம்மொழியாம் தமிழின் பழம் சிறப்பை அறிவியல் பூர்வமாக உலகுக்கு விளக்குவது அவசியம். அந்தப் பணியை வரலாற்று ஆய்வாளர்களை விட, தமிழறிஞர்கள் பலரும் மேற்கொண்டு வருகின்றனர் என்பதற்கு இதுபோன்ற நூல்களே சான்று. பழங்காலம் முதல் இன்றுவரை உள்ள தமிழ் இலக்கியங்களின் வழியாக தமிழின் சிறப்பை விளக்கியிருப்பது சிறப்பு.

தமிழின் தோற்றம், வளர்ச்சியை இன்றைய நாள் வரை அறிய உதவும் அற்புதப் பெட்டகமாக இந்நூல் அமைந்துள்ளது. அந்தந்தக் காலகட்டங்களில் தோன்றிய இலக்கியங்களையும், அவற்றின் விளக்கங்களையும் மட்டுமே சுட்டியிருப்பதாக டாக்டர் மு. வரதராசனார் முன்னுரையில் குறிப்பிட்டுள்ளார்.

ஆனால் ஒவ்வொரு காலகட்டத்தில் இருந்த சமூக, அரசியல், பொருளியல் சூழல்களுக்கேற்ப இலக்கியங்கள் வளர்ந்துவந்த விதத்தை நூலாசிரியர் விளக்கியிருப்பதைக் காண முடிகிறது. நூலின் பிற்சேர்க்கையான இந்திய விடுதலை இயக்கமும் தமிழ்நாட்டில் அதன் செல்வாக்கும் கட்டுரை தமிழ் இலக்கிய வரலாற்றை இலக்கியத்துக்கு அப்பாலும் விரித்துச் செல்கிறது.

கடந்த ஆண்டு சாகித்ய அகாதெமி விருதுபெற்ற தமிழ், நாவல் வரை இந்நூலில் குறிப்பிடப்பட்டிருப்பது முழுமையான தமிழ் இலக்கிய வரலாறாக இந்நூலை உயர்த்துகிறது.

நன்றி: தினமணி, 24/2/2014.

மூளையைக் கூர்மையாக்க 300 பயிற்சிகள், ம. லெனின், சிக்ஸ்த் சென்ஸ் பப்ளிகேஷன்ஸ், சென்னை 17, பக். 296, விலை 185ரூ.

மனிதமூளை ஓர் அற்புதமான இயந்திரம். அதை முறைப்படி கையாண்டால் யாராக இருந்தாலும் சாதனையின் சிகரத்தை அடைய முடியும் என்பதை நூலாசிரியர் ஆணித்தரமாகக் கூறியுள்ளார்.

மூளையை முறைப்படி கையாளுவதற்கு புத்தகத்தில் கூறப்பட்டுள்ள 300 பயிற்சிகளும் சிறப்புக்குரியவை. அவற்றுடன் தொடர்புபடுத்தி கொடுக்கப்பட்டுள்ள எடுத்துக்காட்டுகளும், படங்களும் புத்தகத்தைப் படிப்பதற்கான ஆர்வத்தை அதிகரிக்கிறது.

நமது அன்றாட வாழ்க்கையில் நாம் வித்தியாசமாகச் செய்யும் சிறிய சிறிய செயல்கள்கூட சாதனைதான். பெரிய செயல் மட்டுமே சாதனை என்று கூறிவிட முடியாது என்பதை நூலாசிரியர் புத்தகத்தின் பல இடங்களில் நினைவுபடுத்தி, தன்னம்பிக்கையை வலுப்படுத்துகிறார்.

உண்மையிலேயே இந்தப் புத்தகத்தை உருவாக்கியதன் பின்னணியில் நூலாசிரியரின் கடினமான உழைப்பு உள்ளது என்பதை மறுக்க முடியாது. புத்திசாலி அவதாரம் எடுக்க வேண்டும் என்று விரும்பும் யாராக இருந்தாலும் இந்தப் புத்தகத்தைப் படித்து, கொடுக்கப்பட்டுள்ள பயிற்சிகளை செவ்வனே செய்துவந்தால், அவர்களுடைய கனவு நனவாவது உறுதி.

நன்றி: தினமணி, 24/2/2014.

—-

வாலி 100, நெல்லை ஜெயந்தா, வாலி பதிப்பகம், 12/28, சவுந்தர்ராஜன் தெரு, தியாகராய நகர், சென்னை 17, விலை 130ரூ.

தலைமுறைகளைக் கடந்து ஜெயித்த தமிழ்த் திரையுலகப் பாடலாசிரியர் மறைந்த வாலி. இவர் சந்தித்த அரசியல், சினிமா ரகசியங்கள் பல இருந்தாலும் அவற்றில் 100 சம்பவங்களை தொகுத்து நூலாக்கப்பட்டு உள்ளது. இதில் இடம் பெற்றுள்ள எம்.ஜி.ஆருக்கு பிடித்த கவிதை வரிகள் அனைவரையும் சிந்திக்க வைக்கிறது.

அதேபோல் ஈழத்தமிழர் பிரச்சினையை மையமாக வைத்து, புலால் திண்ணும் புத்தன் என்ற தலைப்பில் எழுதிய கவிதை கண்ணீரை வரவழைக்கிறது. கோபாலபுரமும், ராமாபுரமும் என்ற தலைப்பில் எழுதப்பட்ட செய்தியில் கருணாநிதியும், எம்.ஜி.ஆரும் பரஸ்பர அன்பு பாராட்டியதையும் தெளிவு பட கூறிப்பிடப்பட்டு உள்ளது.

ஒரு மனிதனின் வெற்றியை தலைக்கு கொண்டு போககூடாது. தோல்வியை இதயத்திற்கு கொண்டு போக கூடாது என்ற வாலியின் பல அனுபவ மொழிகளும் நூலில் இடம்பெற்றுள்ளன.

நன்றி: தினத்தந்தி, 12/3/2014.

வீரப்பன் பிடியில் பதினான்கு நாட்கள், வண்ணன்,வெளியீடு காலச்சுவடு பதிப்பகம், நாகர்கோவில், விலை ரூ. 175.

 

To buy this Tamil book online: https://www.nhm.in/shop/100-00-0002-195-7.html

கர்நாடகாவைச் சேர்ந்த பிரபல வனவிலங்கு புகைப்படக்காரர்களான கிருபாகர் சேனானி இருவரையும் அரசு உயர் அதிகாரிகள் என நினைத்து வீரப்பன் கடத்திவிடுகிறார்.

தன்னார்வ வனவிலங்கு புகைப்படக்காரர்கள் எனத் தெரிய வந்ததும் வீரப்பனுக்கும் இருவருக்கும் நட்பு உருவாகிறது. காட்டுப் பறவைகள் குறித்து நிறைய விஷயங்களை இருவரிடமும் ஒரு குழந்தையின் ஆர்வத்துடன் கேட்டு வீரப்பன் தெரிந்துகொள்கிறார்.

வீரப்பனுடன் இருந்த தங்கள் அனுபவத்தை Birds, Beasts and Bandits: 14 Days with Veerappan என்னும் பெயரில் புத்தகமாக வெளியிட்டுள்ளனர். இது தமிழில் வீரப்பன் பிடியில் பதினான்கு நாட்கள் என்னும் பெயரில் வெளிவந்துள்ளது.

தமிழகம், கர்நாடகம் மட்டுமல்லாது இந்தியா முழுவதும் கொடூரமான கடத்தல்காரனாக அறியப்பட்ட வீரப்பனின் இன்னொரு முகம் இந்தப் புத்தகத்தில் தெரிய வருகிறது. அந்தப் புத்தகத்தில் இருந்து ஒரு பகுதி…

ஒரு நாள் தங்கள் கோரிக்கைகளை அரசிடம் வலியுறுத்துவதற்காகக் காட்டிற்குள் வரும் வெளிநாட்டுப் பயணிகளை கடத்த திட்டம் போடுகிறார்கள் வீரப்பன் கூட்டாளிகள். அதுபோல ஒரு வேனும் கடத்தப்படுகிறது. ஆனால் வேனுக்குள் இருந்ததோ இந்தியர்கள். வேனுக்குள் இருந்தவர்களை கிருபாகர் சேனானியை நேர்காணல் செய்யச் சொல்கிறார் வீரப்பன். சந்திப்பு தொடங்கியது.

எங்கேயிருந்து வரீங்க? டில்லி. எங்கோ பாதாளத்திலிருந்து ஒலிப்பதுபோல இருந்தது அவர் குரல். அதற்குள் வீரப்பன் அவசரமாக என்ன சொல்றான்? என்று காதைக் கூர்மையாக்கி, இன்னொரு முறை கேள்வியைக் கேட்கும்படி சொன்னார்.

ப்ளீஸ் ரிபீட். நீங்க எந்த ஊரைச் சேந்தவங்க? பஞ்சாப். அட சற்று முன்புதானே டெல்லி என்று சொன்னார் என்றெல்லாம் யோசிப்பதற்குள் அவர் அச்சத்தின் உச்சத்தில், இந்தியில் விவரங்களைச் சொல்லத் தொடங்கினார்.

அதற்குள் வீரப்பன், இவன் என்ன ஒரு தரம் தில்லின்னு சொல்றான், இன்னொரு தரம் பஞ்சாப்னு சொல்றான்? என்று அவனுடைய பதிலில் திருப்திப்படாதவனாக முணுமுணுத்தான்.

இந்த ஆளுக்கு முதலில் மூளை செயலிழந்தது, பிறகு கால், அதற்கப்புறம் நாக்கு என ஒவ்வொன்றும் செயலிழந்தன். இப்போது இந்தக் குழப்பத்தில் வயிற்றிலும் பிரச்சினை ஏற்பட்டுவிட்டது.

அவருடைய உடலிலிருந்து வெளிப்பட்ட டர்… என்னும் நீண்ட சத்தம் அவருடைய பயத்தை அங்கிருந்த அனைவரும் அறியும்படி செய்துவிட்டது. வீரப்பன் வேறொரு பக்கமாகத் தலையைத் திருப்பிக்கொண்டு, அப்படியே மீசையைத் திருகியவண்ணம் பொங்கிவரும் சிரிப்பை விழுங்கியபடி, சரிசரி, அவனுக்கு எவ்வளவு சம்பளம்னு கேளு என்றான்.

முதல் பார்வையிலேயே அவர் அரசுத்துறையைச் சேர்ந்த பெரிய அதிகாரியாக இருக்கலாம் என்று தோன்றியது. இதைப் புரிந்துகொண்டதும் சற்றே வேகமாக ஆங்கிலம் மற்றம் இந்தியில் கேள்விகளைக் கேட்பதுபோலக் கேட்டுவிட்டு, பிறகு வீரப்பன் பக்கமாகத் திரும்பி, இவர் அரசாங்க அதிகாரிபோலத் தெரியவில்லை.

ஏதோ ஒரு பொதுநிறுவனத்தில் வேலை செய்பவராக இருக்கலாம் என்று என்னென்னமோ சொல்லி முடித்தேன். சிறுது யோசித்த வீரப்பன் சரி அந்தப் பக்கமா உக்காரச் சொல்லு என்று எங்களிடமிருந்து இருபதடி தொலைவில் ஒரு இடத்தைக் காட்டினான்.

அந்த ஆள் உயிரே இல்லாதவரைப் போலக் கால்களை இழுத்து இழுத்து சொன்ன இடத்தில் உட்கார்ந்தார். இவ்வாறகச் சந்திப்பு தொடர்ந்து நிகழ்ந்தது. யாரையும் தேர்ந்தெடுக்கவில்லை.

ஒரே விதமான கேள்விகளைக் கேட்டுக் கேட்டு எனக்கும் அலுப்பாக இருந்தது. அதற்குப் பிறகு வந்தவர்களில் ஒருவரிடம் கேள்விகளில் சற்றே மாற்றம் செய்தேன்.

வாட் ஈஸ் யுவர் நேம்?

துபை.

வேர் ஆர் யு வொர்க்கிங்?

மலையாளம்.

அண்ணே இவனுக்கு மலையாளம் மட்டும்தான் தெரியும்போல. நீங்களே கேள்வி கேளுங்க, என்று சொன்னேன். பொருத்தமே இல்லாத அச்சூழலும் பதில்களும் வீரப்பனிடம் என்ன மாதிரியான உணர்வை ஏற்படுத்தியதோ, தெரியவில்லை.

சரி…அந்தப் பக்கமா உக்கார சொல்லு என்று ஏற்கனவே மனம் சோர்ந்து உட்கார்ந்திருந்த ஆட்கள் பக்கமாக அனுப்பி வைத்தான். வேனுக்குள் இருந்தவர்களில் ஒருவர்கூடக் கடத்தப்படுவதற்குரிய தகுதியோடு இல்லாத விஷயம் வீரப்பன் கோபம் பெருகக் காரணமாக அமைந்துவிட்டது.

சிறிது நேரத்துக்குப் பிறகு, எங்களுக்கு எதிர்ப்புறத்தில் மௌனமாக உட்கார்ந்திருந்த டாக்கடர் சத்யவிரத மைத்தியின் பக்கமாகப் பார்த்தான் வீரப்பன். அவனிடம் கேள்விகள் கேட்டும்படி என்னிடம் சொன்னான்.

நன்றி: தி இந்து, 15/3/2014.

திருவாரூர் கே. தங்கராசு நினைவலைகள், தந்தை பெரியார் திராவிடர் கழகம், பக். 288, விலை 200ரூ.

1947ஆம் ஆண்டிலிருந்து தந்தை பெரியாரின் தலைமையில் இயக்கப் பணியாற்றி கழகத்தின் முக்கிய நிகழ்வுகளில் பங்கேற்ற திருவாரூர் கே. தங்கராசுவின் பெரியார் பற்றிய, கழகம் பற்றிய நினைவலைகளின் தொகுப்பே இந்நூல். அந்த வகையில் இது அறுபத்தைந்து ஆண்டுகால திராவிடர் இயக்கத்தின் வரலாறாக காணும் தகுதி கொண்டிருக்கிறது.

தந்தை பெரியாரின் கொள்கைகளை மக்களிடம் கொண்டு செல்ல தன் வாழ்க்கையையே அர்ப்பணித்தவராக கே. தங்கராசு இந்நூல் வழி நம் மனதில் பதிகிறார்.

இயக்கத்தின் வளர்ச்சிக்கு தமிழினத்தின் மான மீட்புக்கு, பகுத்தறிவு எழுச்சிக்கு திருவாரூர் தங்கராசு எந்தளவு உறுதுணையாக விளங்கினார் என்பதை இந்நூலின் ஒவ்வொரு பக்கமும் உணர்த்துகிறது.

-இரா. மணிகண்டன்.

நன்றி: குமுதம், 26/2/2014.

—-

பெய்ரூத்திலிருந்து ஜெருசலேம் வரை, ஆங்க் ஸ்வீ சாய், தமிழில் பெமினா, அடையாளம், புத்தாநத்தம், பக். 422, விலை 320ரூ.

To buy this Tamil book online: https://www.nhm.in/shop/100-00-0001-729-1.html

மலேசியாவில் உள்ள பினாங்கைச் சேர்ந்த மருத்துவரான ஆங்க் ஸ்வீ சாய், பிரிட்டனில் உள்ள செயின்ட் பர்தோலோ மியூ மருத்துவமனையில் தற்போது பணியாற்றுகிறார். 1982இல் பெய்ரூத் நகர் மீது இஸ்ரேலியப் போர் விமானங்கள் தொடர்ந்து நடத்திய தாக்குதல்களை தொலைக்காட்சியில் கண்டு அதிர்ச்சியடைந்த அவர், பெய்ரூத்தில் போரால் பாதிக்கப்பட்டவர்களுக்கு மருத்துவம் செய்ய அங்கு சென்றார்.

பாலஸ்தீன மக்கள் படும் துன்பங்களை நேரில் கண்ட இந்நூலை அவர் எழுதியிருக்கிறார். அவர் குறிப்பிடும் சம்பவங்கள் நம்மை உருக வைக்கின்றன. உதாரணமாக, ஒரு நாள் இரவு தாய்மார்கள் தண்ணீர் பிடிக்க வெளியே சென்றார்கள்.

எப்போதும் தோட்டாக்கள் பாயும் திறந்த வெளியில் அந்தக் கிணறு இருந்தது. தண்ணீர் பிடிக்க வெளியே செல்லும் முன்பு தாய்மார்கள் தங்கள் குழந்தைகளை முத்தமிட்டு விடை பெறுவார்கள். காரணம், திரும்பவும் அவர்களைப் பார்க்க முடியுமென்பது நிச்சயமில்லை என்கிற சந்தேகம் அவர்களுக்கு இருந்தது.

அன்றிரவு வெளியே சென்ற பத்துப்பெண்களில் நால்வர் மட்டுமே திரும்பினார்கள். மற்றவர்கள் சுட்டுக் கொல்லப்பட்டார்கள். பெண்கள் தண்ணீர் பிடிக்கச் செல்வதே உயிரைப் பணயம் வைக்கும் செயலாகிவிட்டது நம்மை அதிர்ச்சியடைய வைக்கிறது.

பாலஸ்தீன இஸ்ரேல் மோதல்களுக்கு காரணம், பாலஸ்தீன நாட்டை, அழித்து அதன் மக்களை விரட்டியடித்துத்தான் இஸ்ரேல் என்ற நாட்டை உருவாக்க முடியும் என்ற தவறான எண்ணம்தான் என்கிறார் நூலாசிரியர். பாலஸ்தீன மக்களின் போராட்டத்தைத் தெரிந்து கொள்ள உதவும் சிறந்த நூல்.

நன்றி: தினமணி, 24/2/2014.

தமிழ்நாட்டுப் பறவைகள், க. ரத்னம், மெய்யப்பன் பதிப்பகம், புதுத்தெரு, சிதம்பரம் 608001, பக். 182, விலை 300ரூ.

மயில், குயில், குருவி, கிளி, புறா, காகம், ஆந்தை, மரங்கொத்தி, உள்ளான், முக்குளிப்பான் என தமிழகத்தில் அதிகம் காணப்படுகிற 328 பறவைகளைப் பற்றிய நூல். அவற்றின் உடல் அமைப்பு, நிறம், குரல், குணம், உணவு, வாழுமிடம், இனப்பெருக்க காலம், கூடுகள், முட்டைகள் உள்ளிட்ட ஏராளமான விவரங்கள் கொட்டிக் கிடக்கிற அரிய நூல்.

குழந்தைகள், பள்ளி, கல்லூரி மாணவர்கள், பறவை ஆர்வலர்கள், வனத்துறை ஊழியர்கள் உட்பட பலருக்கும் பறவை இனங்களை விரைவாக அடையாளம் காண உதவும் வகையில் நுலாசிரியர் விளக்கியிருக்கும்விதம் பாராட்டுக்குரியது.

பறவைகளின் தமிழ்ப்பெயர், ஆங்கிலப்பெயர், அறிவியல் பெயர், குடும்பப் பெயர் ஆகியனவற்றோடு பறவைகளின் உடல் அமைப்பையும், நிறத்தையும் வண்ண ஓவியங்களாகவே வடித்திருப்பது நூலுக்கு மேலும் மெருகு கூட்டியிருக்கிறது.

ஒருசில பறவைகளின் வண்ணப் புகைப்படங்களும் நூலில் ஆங்காங்கே இடம் பிடித்திருக்கின்றன. நூலாசிரியரின் அளவு கடந்த ஆர்வத்தாலும் வித்தியாசமான முயற்சியாலும் விளைந்த இந்த நூலுக்கு தமிழக அரசு முதல் பரிசு வழங்கி கௌரவித்திருக்கிறது.

தெரிந்த பறவைகளாக இருந்தாலும், அவற்றைப் பற்றித் தெரியாத பல செய்திகளைச் சொல்லி இருக்கிற சிறந்த நூல்.

நன்றி: தினமணி, 24/2/2014.

—-

தமிழ்வாணன் துப்பறியும் மர்ம நாவல்கள், மணிமேகலை பிரசுரம், 7, தணிகாசலம் சாலை, தியாகராய நகர், சென்னை 17, விலை 320ரூ.

தமிழ் நாவல் உலகில் திருப்புமுனை ஏற்படுத்திய முக்கிய எழுத்தாளர்களில் ஒருவர் தமிழ்வாணன். ஒரு தபால் கார்டில், விலாசம் எழுதும் இடத்தில் ஒரு தொப்பியையும், கறுப்புக் கண்ணாடியையும் வரைந்தால் போதும். தமிழ்வாணனுக்குப் போய்ச் சேர்த்துவிடும்.

அவ்வளவு புகழ். குழந்தைகளுக்காக எழுத ஆரம்பித்த அவர், பின்னர் பெரியவர்களுக்காக எழுதினார். பெரும்பாலும் துப்பறியும் கதைகள், அவடைய துப்பறியும் மர்ம நாவல்கள் கொண்ட 2ம் பாகம் இப்போது வெளிவந்துள்ளது.

பிடி22 டோக்கியோவில் தமிழ்வாணன், கெய்ரோவில் தமிழ்வாணன் பிராங்க்பர்ட்டில் தமிழ்வாணன் ஆகிய 4 நாவல்கள் இதில் உள்ளன. தமிழ்வாணன் கதைகள் என்றால் விறுவிறுப்புக்கு பஞ்சம் ஏது? புத்தகத்தை கையில் எடுத்தால் முடிக்கும்வரை வேறு வேலையில் கவனம் செல்லாது.

நன்றி: தினத்தந்தி, 12/3/2014.

தராசுரம் ஐராவதீசுவரர் திருக்கோயில்(இராசராசேச்சரம்), முனைவர் குடவாயில் பாலசுப்ரமணியன், சுவாமி தயானந்தா அறக்கட்டளை, மஞ்சக்குடி, திருவாரூர் மாவட்டம், பக். 570, விலை 1000ரூ.

திருத்தொண்டர் புராணத்தை வரலாறாக பதிவு செய்தவர் தெய்வத்தமிழ் சேக்கிழார், பெரியபுராணம் வரலாற்று ஆவணம். அலகில் சோதியன், அம்பலத்தாடுவானின், அன்பை விளக்கும் அருள் நூல்.

முதல் மந்திரியாக இருந்தவர் சேக்கிழார். அப்போது குலோத்துங்க மன்னன் ஆட்சி இருந்தது. அம்மன்னன் மகன், சேக்கிழார் காலத்தில், அத்திருத் தொண்டர் புராணத்தை, கலை நுட்பத்துடன் வடித்தெடுத்த அருமை. தராசுர சிற்பங்களில் இன்று ஆவணமாக திகழ்கிறது.

கயிலையில் துவங்கி, கயிலையில் முடியும் இப்புடைப்பு சிற்பங்களை, அதன் நுட்பங்களை திருத்தொண்டர் புராண தெளிவுடன், சிறந்த படங்களுடன் ஆய்வு செய்து, இந்நூலைப் படைத்த ஆசிரியர் போற்றுதற்குரியவர்.

வெறும் கட்டுரைத் தொகுப்பல்ல. ஆதாரங்கள், ஆய்வுகள், படங்கள், அதில் உள்ள சிறப்பு செய்திகள் ஆகியவற்றைப் பார்க்கும்போது, பெரியபுராணம் இந்த மண்ணின் மணம் பரப்பும் தெய்வீகச் சொத்து என்பதுடன், சிவனை வழிபடுவோர் மாண்புகளையும் சொல்கிற பாங்கை, அதிகம் உணர வாய்ப்பளிக்கிறது.

நம்நாடு, நமது கலாச்சாரப் பெருமை, அதன் விழுமிய தன்மை ஆகியவற்றை வலியுறுத்தும் அருளாளர் தயானந்தா சுவாமிகள், இதற்கு ஆதரவு தந்து நூலை நிறைவாக உருவாக்க உதவிய பாங்கையும் பார்க்கும்போது, இந்த நாட்டின் ஆன்மிக உணர்வு மேலும் வளர, எவ்வித ஆரவாரமும் இன்றி பணியாற்றும் பண்பு புலனாகிறது.

திருத்தொண்டர் புராணத்தில் இல்லையே என்னாத இயற்பகைக்கும் அடியேன் என்று இயற்பகை நாயனாரை குறிக்கும் தொடர் உண்டு. இயற்பகை நாயனாரின் அபார ஈகை குணத்தை சோதிக்க ஆடல்வல்லான், அவர் காதல் மனைவியை கேட்டபோது, மெய்த்தவர்க்கு சற்றும் முகம் கோணாது தந்து சிறப்பு பெற்றவர் இயற்பகையார்.

கணவரின் முடிவைக் கேட்ட காரிகை மனம் கலங்கியபோதும், கணவர் தவறு செய்ய மாட்டார் என்று நம்பி அப்பெண் மணி, அடியார் உருவில் வந்த சிவபெருமான் உடன் செல்ல முற்பட்டபோது, சுற்றத்தார் பலரும் அதைத் தடுக்க வந்தபோது, அவர்களை வாளால் வெட்டி சாய்த்தார் இயற்பகை நாயனார்.

முறை தவறாத மாண்பமை மனைவி, ஈகைக் குணத்தை லட்சியமாக கொண்ட இயற்பகை செயலைக் கண்ட, இறைவன், அவரை பழுதிலாய் என்று அழைத்து நின்மனைவியுடன் நம்பால் வருக என்றழைத்தார். இக்காட்சித் தொடர்கள் தனிமாடத்தில் சிற்பமாக உள்ளன. சிவனடியாராக வந்த பெருமான், சிற்றாடை மட்டும் அணிந்த நிலை, இயற்பகைக்கு கணுக்கால் வரை ஆடை, இயற்பகை மனைவியார் காதில் கொண்டையுடன் காணும் பாங்கு, கடைசியில் மாதொருபாகனாக சிவபெருமான் விடைமீது அமர்ந்து, காட்சி தரும் நிலை (பக். 130) ஆகியவற்றை விளக்கிய விதம், அனைவரது உள்ளத்தையும் தொடும்.

பெரிய புராண நிகழ்வுகளை வரிசையாக, ஆதாரங்களுடன் விளக்கியதும், அதில் வழக்கமான பொருள் கொள்ளும் முறை தவிர, அடிப்படை ஆதாரங்களுடன் அதற்கு நேர்த்தி கண்டு, சேக்கிழார் பெருமையை உணர்த்தியதுடன், சைவத் தமிழ் ஏற்றத்தை விளக்கும் ஆசிரியர் பணி அளவிடற்கரியது.

ஆசிரியர் அரை நூற்றாண்டு காலம் உழைத்து உருவாக்கிய நூல், ஆதலின் அவரை ஏற்றுவோம், போற்றுவோம் என்று சேக்கிர் அடிப்பொடி முது முனைவர் தி.ந.இராமச்சந்திரன் முன்னுரையில் குறிப்பிட்டிருப்பதை, நூலைப் படிக்கும்போது உணரமுடியும். தமிழ் மட்டுமல்ல. கோயில் கலை மட்டுமல்ல, நமது கலாசாரத்தை படம் பிடிக்கும் நல்ல நூல்கள் வரிசையில் இது மிகவும் சிறப்பானது.

நன்றி: தினமலர், 16/3/2014.

ஆன்மிகம் அறிவோம் சைவ சமய வினாவிடை, பூங்குன்றம் நா.க.ராமசாமி, ஸ்ரீஅலமு புத்தக நிலையம், பக். 128, விலை 50ரூ.

நூலாசிரியர் சைவத் திரு நா.க.ராமசாமி, சைவ சமய சாத்திரங்களில் ஆழப்புழமை நிறைந்த பெருமகனார். மூத்த சைவ ஆதினமான திருவாவடுதுறை திருமகா சன்னிதானத்தின் அருளாசியை முழுமையாக கைவரப் பெற்ற அறிஞர்.

ஆன்மிகம் அறிவோம் என்ற இவரது நூலில் சைவ சமய உட்கருத்துக்களை கேள்வி பதில் வாயிலாக மிக அருமையாக எளிய தமிழில், நூலாகத் தந்துள்ளார். முகப்பு என்ற தலைப்பிட்டுத் துவங்கி முடிவு என்ற தலைப்போடு, 250 கேள்வி பதிலோடு நூல் நிறைவடைகிறது.

வழிபடும் முறை (பக். 24), சிவ வழிபாடு (பக். 31), ஆணவம், வினை, மாயை (பக். 60-61), முக்தி (பக். 91) போன்ற சைவ, சமயத்திற்கு முத்தாய்ப்பான கொள்கைகளையும், கோட்பாடுகளையும் மிகச் சுருக்கமாக ஓர் ஆசிரியர், மாணவனுக்குப் போதிப்பது போன்று விளக்கியுள்ள முறை நூலாசிரியரது சைவ சமய அடிப்படைக் கொள்கைகளை மிக எளிமையாகத் தந்துள்ள இந்நூல் அனைத்து சைவப் பெருமக்களுக்கும் ஒரு கையேடு.

-குமரய்யா.

நன்றி: தினமலர், 16/3/2014.

—-

தமிழ்மொழி சமுதாயம் பண்பாடு, முனைவர் இரா. பாலகிருஷ்ணன், சபாநாயகம் பதிப்பகம், 176, கீழரதவீதி, சிதம்பரம் 1, விலை 250ரூ.

சமுதாயமும் பண்பாடும், சமுதாயமும் மொழியும், தமிழ்ச் சமுதாயத்தில் கூற்றாடல் நெறி.

தொல் தமிழரின் மனித இனம் சார் மொழியியல் கொள்கை, தொல்காப்பியம், பொருளதிகாரமும், தமிழ்ச் சமுதாயமும், மொழியும் பண்பாடும், தற்காலத் தமிழும் பண்பாடும் ஆகிய தலைப்பின்கீழ் ஆய்வு நோக்கில் படைக்கப்பட்ட இந்நூல் அழகாகவும், அகலமாகவும் விளக்கப்பட்டுள்ளது.

சமுதாய வரலாறு, கற்க விரும்புவோருக்கு பயன்படும் நூல்.

நன்றி: தினத்தந்தி, 12/3/2014.

ஓமந்தூரார் முதல்வர்களின் முதல்வர், எஸ். ராஜகுமாரன், விகடன் பிரசுரம், 757, அண்ணாசாலை, சென்னை 600002, பக். 176, விலை 85ரூ.

To buy this Tamil book online: https://www.nhm.in/shop/100-00-0001-862-4.html

மறைந்த சென்னை மாகாணத்தின் முதல்வர் ஓமந்தூரார் பி. ராமசாமி ரெட்டியாரின் வாழ்க்கை வரலாற்றை அழகாக, எளிய நடையில் எழுதியுள்ளார் நூலாசிரியர்.

இரண்டாடுகள் மட்டுமே ஆட்சியில் இருந்தாலும், இன்றளவும் ஓமந்தூராரின் நிர்வாகத்திறமை போற்றப்படுகிறது. அதனை பல சான்றுகளோடு விளக்குகிறார். நிர்வாக பயிற்சி ஏதும் இல்லாது, ஆட்சியில் அமர்ந்து அரிய சாதனை படைத்த ஓமந்தூராரை, நேரு பாராட்டியவிதம் போன்றவை அரிய தகவல்கள்.

ஒரு உன்னதமான, அப்பழுக்கற்ற, அரசியல்வாதியின் வாழ்க்கையை படிக்கும்போது, இன்றைய அரசியல்வாதிகள் மனதில் வந்துபோகின்றனர். இளைய தலைமுறை படித்தறிய வேண்டிய புத்தகம்.

-ஜி.வி.ஆர்.

நன்றி: தினமலர், 16/3/2014.

—-

தொல்தமிழியச் சிந்து நாகரிகம், தமிழ்மண் பதிப்பகம், 2, சிங்காரவேலத் தெரு, தி.நகர், சென்னை 17, விலை 125ரூ.

சிந்து நாகரிகத்தைப் பற்றிய முழுமையான செய்திகள் ஆதாரங்களுடன் வெளிவந்திருக்கும் நூல். மாந்த இனத் தோற்றமும் பரவலும், மொழியின் தோற்றமும் பரவலும் பற்றிய செய்திகள் தரப்பட்டுள்ளன.

சிந்து நாகரிகம் சார்ந்த பல்வேறு கூறுகளான வாழ்வியல் எடை, அளவு, கலை, பண்பாடு, சமயம் பற்றிய செய்திகள் மற்றும் வரலாற்று மொழியியல்-தொல்லியல் செய்திகள் ஆய்வு நோக்கில் விளக்கப்பட்டுள்ளன.

சிந்து அகழ்வு ஆராய்ச்சியில் கிட்டிய சான்றுகள், ஆரியமல்ல தமிழியம் சார்ந்தவை என நிரூபிக்கப்பட்டுள்ளன. இந்நூலைப் படிப்பவர் பயன் கருதி ஆங்காங்கு தலைசிறந்த ஆய்வறிஞர்களின் முக்கியமான ஆதாரக் கருத்துக்களின் ஆங்கில மூலங்களையும் தொகுத்தளித்துள்ளார் ஆசிரியர் பி. ராமநாதன்.

நன்றி: தினத்தந்தி, 12/3/2014.

ஓமந்தூரார் முதல்வர்களின் முதல்வர்

திருப்பதி ஒரு வாழ்க்கைக் கையேடு, கோட்டா நீலிமா, மணிஜல் பப்ளிசிங் ஹவுஸ் (பி) லிட், 7/32, தரைத்தளம், அன்சாரி ரோடு, தர்யாகனிஜ், புதுடில்லி 110002, பக். 275, விலை 199ரூ.

கலியுக தெய்வமாகத் திகழும் திருப்பதி வேங்கடாசலபதி பெருமாள் குறித்த விவரங்கள் அனைத்தும், இந்நூலில் உள்ளன. அனைத்துப் பாவங்களையும் போக்குபவன் என்று நினைத்தே, மக்கள் வேங்கடாசலபதியை வணங்குகின்றனர்.

இதற்கு ஆதரவாக இந்நூல் பல செய்திகளையும் கூறுகிறது எனலாம். திருப்பதியின் தோற்றம், சுவாமி வேங்கடாசலபதியின் தத்துவம், பக்தனின் வழிமுறைகள், திருப்பதி ஏழுமலையான் கொண்டாட்டங்கள் என்று நான்கு பெரும் பிரிவுகளில் இந்நூல் திகழ்கிறது. பக்தர்கள் படிக்க வேண்டிய அருமையான நூல்.

-டாக்டர் கலியன்சம்பத்து.

நன்றி: தினமலர், 16/3/2014.

—-

உள்ளத்திற்கு ஐந்தாவது கோப்பை சூப், கண்ணதாசன் பதிப்பகம், 23, கண்ணதாசன் சாலை, தி.நகர், சென்னை 17, விலை 150ரூ.

To buy this Tamil book online:https://www.nhm.in/shop/100-00-0000-236-6.html

வாழ்க்கையை ஒரு புதிய கண்ணோட்டத்தில் பார்க்கத் தூண்டும் உண்மைக் கதைகளின் தொகுப்பு நூல். மனிதர்களை செயல்படத் தூண்டுபவர் என முத்திரை பதித்த மார்க் விக்டர் ஹான்ஸனும், ஜாக்கேன் பீல்டும் ஆங்கிலத்தில் படைத்ததை தமிழுக்கு மொழிமாற்றம் செய்திருக்கிறார் வேங்கடகிருஷ்ணன்.

நன்றி: தினத்தந்தி, 12/3/2014.

தமிழர் தளபதிகள், புலவர் கா. கோவிந்தன், ஸ்ரீ செண்பகா பதிப்பகம், 32பி, கிருஷ்ணா தெரு, பாண்டிபஜார், தி.நகர், சென்னை 17, பக். 112, விலை 70ரூ.

களம் புகுந்து போரிடும் கரி, பரி, தேர், காலான் என்ற நாற்படையினும், அந்நாற்படையைக் காலமும், இடமும் அறிந்து, களம் புகுந்து வெற்றி கண்ட தமிழர் தளபதிகள், அதியன் துவங்கி, குதிரை மலைப்பிட்டன், கோடைப் பொருநன், திருக்கண்ணன், வில்லவன் கோதை, பரஞ்சோதியார், கருணாகரன் இவ்விதமாக 16 தளபதிகளின் சுருக்க வரலாறுகளை, அவர் காலத்தே வாழ்ந்த புலவர்களின் பாடல்கள் மூலம் படைச் சிறப்பை, போர்ப்பண்பை, மறவர்களின் மாண்பை விளக்கியுள்ளார் நூலாசிரியர்.

உள்ளுவது எல்லாம் உயர்வு உள்ளல் என்ற உயர்நோக்குடைய தளபதிகளில், முயல் வேட்டம் புரிவோன், செயலினும் யானை வேட்டம் புரிவோன் செயலே நனி பாராட்டுக்குரியராம் எனப் பல்வேறு இலக்கியப் படைப்புகளை எடுத்துக்காட்டியுள்ள தோற்றுவாய் கட்டுரை ஆசிரியரின் புலமை நலத்தை உணர்த்தும் அருமையான ஒன்று.

-பின்னலூரான்

நன்றி: தினமலர், 16/3/2014.

—-

ஜோதிடத்தில் மருத்துவம், கி. சங்கரநாராயணம், மேகதூதன் பதிப்பகம், 7, சின்னப்ப ராவுத்தர் தெரு, திருவல்லிக்கேணி, சென்னை 5, விலை 70ரூ.

ஜோதிட ரீதியாக ஒருவரது ஜாதகத்தில் கிரகங்களின் மாற்றத்தால் ஏற்படும் நோய்கள் குறித்தும், நோய்களை தீர்க்கும் கிரகங்கள் குறித்தும் இந்நூல் ஆசிரியர் விளக்கியுள்ளார். ஆயுர்வேத முறைப்படி நோய்களை தீர்க்கும் மருந்துகளும் தெரிவிக்கப்பட்டுள்ளது.

நன்றி: தினத்தந்தி, 12/3/2014.

திருக்குறளில் உயிரனங்கள், புலவர் ஆர். நாராயணன், பூங்கொடி பதிப்பகம், பக். 104, விலை 50ரூ.

திருக்குறளைப் பலர் பல கோணங்களில் அலசி ஆராய்ந்திருக்கின்றனர். இந்நூலாசிரியர், திருக்குறளின் அதிகாரங்களிலிருந்து உயிரினங்களை வகைப்படுத்தி, அவற்றின் சிறப்பான இயல்புகளை திருக்குறளில் இயற்கை, திருக்குறளில் தாவரம், திருக்குறளில் விலங்குகள் என்னும் தலைப்புகளில் விளக்கியிருப்பது மிகவும் புதுமையானது.

இந்நூலைப் படித்துவிட்டு, மீண்டும் திருக்குறளைப் படிக்கும் தமிழன்பர்கள் திருக்குறளில் புதியதொரு இலக்கிய இன்பத்தை அனுபவிப்பர் என்பது நிச்சயம்.

-மயிலை சிவா.

நன்றி: தினமலர், 16/3/2014.

—-

அம்மா, வாதினி, 19-29, ராணி அண்ணாநகர், கே.கே. நகர், சென்னை 78, விலை 120ரூ.

பிரபல இதழ்களில் வெளிவந்த சிறுகதைகளின் தொகுப்பு நூல். கதைகளில் வரும் நிகழ்வுகள் பலரின் வாழவில் அன்றாடம் சந்திக்கும், நடந்து கெண்டிருக்கும் நிகழ்வுகள்தான் என்றாலும், படித்தபின் மனதில் அசைபோட வைக்கும் சிறுகதைகளாக ஆக்கியுள்ளார் நூலாசிரியர் சுப்ரஜா.

நன்றி: தினத்தந்தி, 12/3/2014.

—-

நாடகக் களஞ்சியம், ப. வேட்டவராயன், சாகுந்தலை பதிப்பகம், 15, அம்மச்சார் கோவில் தெரு, காவேரிப்பாக்கம், திண்டிவனம் 604001, விலை 185ரூ.

விநாயகர் விஜயம், கடமைக்கொரு கபிலர், ஸ்ரீ ராமானுஜர் ஆகிய 3 நாடகங்களை உள்ளடக்கிய நாடக நூல் இது. பக்தி, வரலாறு, சமுதாய சீர்திருத்தம் என்ற அடிப்படையில் எழுதப்பட்டுள்ள இந்த நாடகங்கள், படிக்கும்போதே காட்சிகள் மனதில் பதியும் வண்ணம் எளிய நடையில் அமைக்கப்பட்டு உள்ளன.

நாடகங்களில் நகைச்சுவை உள்ளிட்ட அத்தனை அம்சங்களும் அடங்கியிருப்பதுடன், இயல், இசை, நாடகம் என முத்தமிழும் இழையோடியிருப்பது சிறப்பு.

நன்றி: தினத்தந்தி, 12/3/2014.

நீ தெய்வீகமானவன், சுவாமி விவேகானந்தர், சுவாமி விவேகானந்தர் விழித்தெழு பதிப்பகம், பக். 448, விலை 200ரூ.

விவேகானந்தரின் 150வது அவதார ஆண்டில் வெளியான சிறப்பான தொகுப்பு நூல். சுவாமி விவேகானந்தரின் சொற்பொழிவுகள், சோர்ந்த தனிதனை எழுப்பி, சாதனை செய்ய வைக்கும் தீப்பிழம்பை எழுப்பும் சக்தி கொண்டவை.

ராம கிருஷ்ணமடம் வெளியிட்ட எழுந்திரு விழித்திரு என்னும் 11 பாகங்களில் இருந்து தொகுக்கப்பட்ட பரவசம் தரும் புதுநூல். இயற்கை, இறைவன், ஆன்மா பற்றிய விளக்கமும், படைப்பு என்ற தலைப்பில் சிறப்பாகக் கூறப்பட்டுள்ளது.

பிராண சக்தி பிரபஞ்சம் முழுவதும் பரவியுள்ளது. முதலில் ஆகாசம் தோன்றியது. அதன் பிறகே மற்றவை தோன்றின. உலக இயக்கம், அதிர்வு, எண்ணம் எல்லாம் உருவாயின என்று பிராணன் விளக்கப்பட்டுள்ளது.

ஞானப் புதையலாகிய வேதங்களும், விளக்கம் தரும் உபநிடதங்களும், துணிவும், வலியும் தரும் பகவத் கீதையும் புதிய கோணத்தில் காட்டப்பட்டுள்ளன. 33 தலைப்புகளும் வாழ்க்கைப் பாடமாகத் தரப்பட்டுள்ளன.

வாசித்தவர்கள் புதிய வலிமை பெறுவர். ஆன்மிக சக்தியால் இந்தியாவையும் ஆத்ம சக்தியால் இந்தியனையும் விழித்து எழச் செய்யும் வியத்தகு நூல் இது.

-முனைவர் மா.கி. ரமணன்.

நன்றி: தினமலர், 16/3/2014.

—-

நீங்களும் முதலாளி ஆகலாம், ஸ்ரீமாருதி பதிப்பகம், 200-173, பீட்டர்ஸ் காலனி, ராயப்பேட்டை, சென்னை 14, விலை 115ரூ.

சிறுதொழில் மூலம் பெரும் செல்வம் சேர்ப்பது எப்படி? கிடைத்த செல்வத்தைத் தக்க வைத்துக் கொள்வது எப்படி? ஒரு வெற்றிகரமான தொழிலதிபராகவும், ஒருபொறுப்புள்ள குடிமகனாகவும் திகழ்வது எப்படி? போன்ற வினாக்களுக்கும் விடையளிக்கும் நூல்.

தானும் வாழ்ந்து, பிறரையும் வாழவைக்கும் எண்ணம் இருப்போருக்கு இப்புத்தகம் வழிகாட்டியாய் உதவும். சிறு தொழில்களை உயிர்ப்பிக்கும் முயற்சியாக இந்நூலை படைத்திருக்கிறார் நூலாசிரியர் கீதா பிரேம்குமார்.

நன்றி: தினத்தந்தி, 12/3/2014.

குறிஞ்சிப் பாட்டு பதிப்பு வரலாறு, முனைவர் நித்யா அறவேந்தன், காவ்யா, பக். 176, விலை 150ரூ.

சங்க இலக்கியங்கள் இணையற்ற ஏற்றம் உடையவை. அவற்றுள் கபிலர் வழங்கியுள்ள குறிஞ்சிப்பாட்டு ஆரிய அரசன் பிரகதத்தனுக்குத் தமிழ் ஊட்டியது. தமிழ் தாத்தா உ.வே.சா., 1889ல் இந்நூலின் முதற்பதிப்பை வெளியிட இப்போது, 2011 வரை 35 பதிப்புகள் வெளிவந்துள்ளன.

நூலாசிரியர் பதிப்பு வரலாற்றுடன் உரைகளின் போக்கு, உரை வேறுபாடுகள், உவமைகள், உலகாயுதச் சிந்தனைகள், குறிஞ்சிப் பாட்டின் மலர்கள், ஒப்பீடு, சொல், பொருள், அடைவு என விரிவாக ஆராய்ந்துள்ளார். பதிப்பு வரலாறு அட்டவணை நூலில் தரப்பட்டுள்ளது.

சங்க இலக்கியங்களில் தோய்ந்த அறிஞர் பெருமக்கள் மட்டுமல்லாது, தமிழ் படிப்பறிவு உடைய எவரும் புரிந்து கொண்டு மகிழத்தக்க வகையில் நூல் எழுதப்பட்டுள்ளமை பாராட்டுக்குரியது.

-கவிக்கோ ஞானச்செல்வன்.

நன்றி: தினமலர், 16/3/2014.

—-

ஆன்மிகம் அறிவோம் சைவ சமய வினாவிடை, பூங்குன்றம் நா.க.ராமசாமி, ஸ்ரீஅலமு புத்தக நிலையம், பக். 128, விலை 50ரூ.

ஆன்மிகம் சார்ந்த ஏன் என்ற பல வினாக்களுக்கு விடையாக விரிந்துள்ளது இந்நூல். சிவம் என்றால் என்ன? சிவனை ஏன் வழிபட வேண்டும்? கோவில் வழிபாட்டின் நோக்கம் என்ன? என்பது போன்ற பல்வேறு வினாக்களுக்கு தெளிவாக, எளிமையான விளக்கங்களை அளிக்கிறது இப்புத்தகம்.

நன்றி: தினத்தந்தி, 12/3/2014.

வானம் என் வாசலில், பா. கிருஷ்ணன், பாகி எழுத்துலகம், 76, பத்திரிகையாளர் குடியிருப்பு, திருவான்மியூர், சென்னை 41, விலை 60ரூ.

தேடித் தேடி, சாலை, கனவுகள், விழியே போன்ற பல்வேறு தலைப்புகளில் எழுதப்பட்ட கவிதை சொற்கள் புத்தக வடிவில் வெளியாகி உள்ளது. ஒவ்வொரு கவிதைக்கும் அதனுடைய தொடர்புடைய புகைப்படமும் இடம்பெற்றிருப்பது சிறப்பாகும்.

நன்றி: தினத்தந்தி, 12/3/2014.

—–

ஹாரிபாட்டரும் பாதாள அறை ரகசியங்களும், மஞ்சுள் பப்ளிஷிங் ஹவுஸ், 2வது மாடி, உஷா பிரீத் வளாகம், 42, மால்வியா நகர், போபால் 462803, விலை 350ரூ.

சர்வதேச அளவில் விற்பனையில் அமோகமான சாதனைகளைப் படைத்திருக்கும் ஹாரிபாட்டர் புத்தக வரிசையின் 2ம் புத்தகம். முதல் புத்தகத்தைப்போலவே பக்கத்திற்குப் பக்கம் மாயாஜாலம்.

படு சுவாரசியமான கதையோட்டம். வாசகர்களால் யூகிக்க முடியாத திகிலான திருப்பங்கள் ஆகியவை நிறைந்துள்ள இப்புத்தகத்தைக் கையில் எடுத்தால் எவரொருவராலும் படித்து முடிக்காமல் கீழே வைக்க முடியாது.

நூலாசிரியர் ஜே.கே.ரோலிங் ஆங்கிலத்தில் படைத்ததை தமிழுக்கு மொழி மாற்றம் செய்திருக்கிறார் பி.எஸ்.வி. குமாரசாமி.

நன்றி: தினத்தந்தி, 12/3/2014.