சங்கப் பெண் கவிஞர்களின் கவிதைகள், முனைவர் ந. முருகேசபாண்டியன், செல்லப்பா பதிப்பகம் வெளியீடு, பக். 168, விலை 110ரூ.

To buy this Tamil book online: https://www.nhm.in/shop/100-00-0002-462-7.html

அதியமானுடன் அவ்வைக்கு காதலா?

இன்றைய பெண்கள், அழகு தேவதைகளாக, ஆராதனை சிலைகளாக, நுகர்வு தீனிகளாக, வேலியற்ற வேட்டை களமாக மாற்றப்பட்டுள்ளனர். இத்தகு சூழலில், 2000 ஆண்டுகளுக்கு முன்பிருந்த போற்றத்தக்க பெண் கவிஞர்களை, அவர்களின் பாடலோடு இந்த நூல் அற்புதமாய் படம்பிடித்து காட்டுகிறது.

கி.மு. 2ம் நூற்றாண்டு முதல் கி.பி. 2ம் நூற்றண்டு வரை, 400 ஆண்டு காலம் சங்ககாலம் என்று அடையாளப்படுத்தப்பட்டுள்ளது. அதில் பாடிய சங்கப் புலவர்கள், 473பேரில், 41 பேர் பெண்பாற் புலவர்கள். சங்ககாலப் பெண்களின் அறிவு, வளம், அழகு உணர்வு, குடும்பநலம், வீரம், காதல், சமூக நிலை, சமயம், மனத்திட்பம் போன்றவற்றை, அந்த பெண் கவிஞர்களின் பாடல்களால் அறிய முடிகிறது.

சங்க காலத்திற்கு பின், காரைக்காலம்மையார், ஆண்டாள் தவிர பெண் கவிஞர்கள் இல்லை என்பதை இந்த நூலாசிரியர் ஆய்வு செய்து கூறியவிதம் பாராட்டிற்குரியது.

குறிஞ்சி, முல்லை, மருதம், நெய்தல் பின்புலம், பாடல் வருணனைகளில் கலந்து தெரிகிறது. ‘முடவுமுதிர் பலவின் குடம்மருள் பெரும்பழம்’ எனும் அஞ்சியத்தை மகள் நாகையார் பாடிய அகநானூறுப் பாடல், பலாமரக் குடத்தில் செய்த மத்தளக் கருவியை காட்டுகிறது. இன்றளவும் மிருதங்கம் பலாமரத்தில்தான் செய்யப்படுகிறது என்ற உண்மையை இதனால் உணர்கிறோம்.

காதலும், ஊடலும் மட்டுமல்ல, வீரமும் பேசுகிறது சங்கப் பெண் கவிதை புலம். சங்கப்பாடல்கள், தொடர்வண்டிகளாகப் போய் கொண்டே இருக்கும். அடையாளம் காண்பது அரிது. ஆனால், இந்த நூலில், பதங்களைப் பிரித்து, எளிமையான தெளிவுரை எழுதி இருப்பதால், படிப்பவர் முன்பாக பெண் கவிஞர்கள் பாடுவதைக் கேட்டு புரிந்துகொள்ள முடிகிறது.

அரிய பல அறிவியல் செய்திகளையும், சங்கப் பாடல்களில் காண முடிகிறது. அகநானூறு, 16ம் பாடலில் நப்பசலையார், பெண் ஆமை இடும் முட்டைகளை, ஆண் ஆமை அடைகாத்து, குஞ்சு பொரிக்கும் செய்தியைப் பாடியுள்ளார்.

பெண் கவிஞர்கள் பற்றிய சிறுகுறிப்புகளை, நூலின் பின்னால் தந்துள்ள ஆசிரியர், அதியமானுடன் அவ்வைக்கு காதல் தொடர்பு (பக். 159) இருந்ததாக, மறுவாசிப்பு செய்துள்ளது மறுபரிசீலனைக்கு உரியது.

ஊடல் கொள்ளும் பெண்களின், பாடல் புனையும் ஆற்றலுடன் அவர்தம் படைப்பாற்றலில் மிளிரும் புலமையும் கூறி, பெண்மைக்கு தமிழ்மகுடம் சூட்டும் நூலிது.

– மா.கி. ரமணன்.

நன்றி: தினமலர், 29/3/2015.

அறிந்த பாரதம் அறியாத கதைகள், ஒளி உண்போர் (பாகம் 1), வளர்த்த கடா (பாகம் 2), ஸ்ரீ வ. ந. கோபால தேசிகாசாரியார், அட்சுரா பதிப்பகம், சென்னை, பக். 152, 144, விலை 130ரூ, 130ரூ.

மகாபாரதம் பிரதான கதை பலரால் எழுதப்பட்டு புத்தகங்களாக வெளிவந்துள்ளன. ஆனால் மகாபாரதத்துடன் தொடர்புடைய ஏராளமான கிளைக் கதைகள் அதிக அளவு வெளிவரவில்லை. அத்தகைய பல்வேறு கதைகள் இந்நூலில் தொகுக்கப்பட்டுள்ளன.

தௌம்பயர்- ஆருணி, தௌம்யர் – உபமன்யு சம்பவங்கள் குருபக்திக்கான உதாரணமாக விளங்குகின்றன. பொறாமை கூடாது என்பதற்கு எடுத்துக்காட்டாக சகோதரிகளான கத்ரு, வினதையின் கதை விளக்குகிறது. உருவத்தைக் கண்டு இகழக்கூடாது என்பதை வாலகில்யர்கள் என்ற முனிவர்களது கதையும், பெரியோரை இகழ்ந்தால் துன்பம் ஏற்படும் என்பதைப் பரீட்சித்து மன்னன் இறப்பும், மதுவினால் ஏற்படும் தீமைகளை சுக்கிராச்சாரியார் – தேவயானி சம்பவமும், முற்பகல் செய்தால் பிற்பகல் பலன் கிடைக்கும் என்பதை மாண்டவ்ய மகரிஷியின் சம்பவமும், சூதாட்டத்தால் ஏற்படும் தீமைகளை நளன்-தமயந்தி கதையும், வாய்மையே வெல்லும் என்பதை அரிச்சந்திரன் கதையும், மூர்த்தி சிறிதானாலும் கீர்த்தி பெரிது என்பதை அகத்திய முனிவரின் கதையும், தீதும் நன்றும் அவரவர் செயல்களாலேயே வருகின்றன என்பதை விதி வலிது என்ற கதையும், ஆண்களுக்கும் கற்பு அவசியம் என்பதை அஷ்டாவக்கிரர் கதையும், பசுவின் பெருமையை சியவன முனிவர் கதையும் விளக்குகின்றன.

சிறுவர் முதல் பெரியவர் வரை அனைவரும் சுவாரசியமாகப் படிக்கும் வகையில் கூறப்பட்டுள்ள இந்தக் கதைகள் வாழ்க்கைக்குப் படிப்பினை ஊட்டுபவையாகவும் உள்ளன.

நன்றி: தினமணி, 24/2/2015.

தமிழிலக்கிய வகைமைகளும் வாழ்வியல் சிந்தனைகளும் (நெய்தல் – 2014), பதிப்பாசிரியர்கள் சு. சதாசிவம், க. கௌசல்யாதேவி, மு. இராசேந்திரன், ஞா. சுஜாதா, க. பூபதி, இல. தங்கராஜ், செம்மூதாய் பதிப்பகம், பக். 556, விலை 400ரூ.

பன்னாட்டுக் கருத்தரங்கம் என்பதை மெய்ப்பிக்கும் வகையில் பல ஊர்களிலிருந்தும் நாடுகளிலிருந்தும் ஆய்வு மாணவர்களும், பல்கலைக்கழகப் பேராசிரியர்களும் கலந்துகொண்டு, தமிழிலக்கியவகைமைகள் தொடர்பான வாழ்வியல் சிந்தனைகளை வழங்கியுள்ளனர்.

இத்தொகுப்பில் உள்ள கட்டுரைகளில் எதைச் சொல்வது? எதை விடுவது? பா. சம்பத்குமாரின் ‘பெண்மையைப் போற்றும் சங்க இலக்கியம்’ தொடங்கி, க. சதாசிவத்தின் ‘கவிஞர் கமலா சிவத்தின் கவிநயம்’ என மொத்தம் 116 கட்டுரைகளிலும் பழைமை, தொன்மை, இறைமை, வகைமை, உண்மை, புதுமை, உரிமை, வறுமை என எடுத்துக்கொண்ட தலைப்புக்கேற்ப அனைத்தையும் ‘மைய’ப்படுத்தியிருக்கிறது.

இவைதவிர, நவீனம், ஊடகம், சுற்றுச் சூழலியல், தமிழியல், வாழ்வியல், ஒப்பீட்டியல், அழகியல், மனிதவளம், மனிதநேயம், குறியிடு, அறம், ஒழுக்கம் முதலியவற்றின் மூலம் தமிழிலக்கிய வகைமைகள் வகைப்படுத்தப்பட்டுள்ளன. சில கட்டுரைகளின் தலைப்புகள், முன்பே பலரும் பயன்படுத்திய தலைப்பாக இருந்தாலும், ஒவ்வொரு கட்டுரையிலும் ஏதாவதொரு புதிய அரிய செய்திகள் இருப்பதை ஒப்புக்கொண்டே ஆக வேண்டும்.

இதுபோன்ற பன்னாட்டுக் கருத்தரங்கக் கட்டுரைகளால், எதிர்காலத்தில் ஆய்வியல்துறை செழிப்புற்று விளங்கும் என்ற நம்பிக்கை பிறக்கிறது.

நன்றி: தினமணி, 24/2/2015.

சிந்தனைக் களஞ்சியம், உ. நீலன், அருள் பதிப்பகம், பக். 248, விலை 130ரூ.

தான் படித்து, பார்த்து, பழகிய செய்திகளை எல்லாம் தொகுத்து இந்த நூலைப் படைத்துள்ளார் நூலாசிரியர். நம் நாட்டுத் தலைவர்கள் மகாத்மா காந்தியடிகள் முதல் எம்.ஜி.ஆர். வரையும், வெளிநாட்டு சர்வாதிகாரிகள் ஹிட்லர், முசோலினி, உலகின் தலைசிறந்த விஞ்ஞானி ஐன்ஸ்டீன், உலகப் புகழ் பெற்ற தத்துவஞானி ஓஷோ வரை அனைவரைப் பற்றியும் நாம் அறிந்திராத பல விஷயங்களை இந்நூலின் மூலம் நாம் அறியலாம்.

உதாரணமாக, சுதந்திரப் போராட்டத் தியாகிகளில் ஒருவரான முகமது அலி ஜின்னா அகில இந்திய முஸ்லிம் லீக் கட்சியில் சேராமல் காங்கிரஸில் சேர்ந்ததற்குக் காரணம் என்ன? காந்தியடிகளை அரசிந்தர் சந்திக்க மறுத்தது ஏன்? இதுபோன்ற பல புரியாத, புதிரான கேள்விகளுக்கு இந்நூலில் விடைகள் உள்ளன.

பெரியாரின் சாப்பாட்டில் மண்ணை அள்ளி போட்ட மணியம்மை, ஆங்கிலேய நீதிபதியின் பெயரை தன் மகனுக்குச் சூட்டிய வ.உ.சி., சாதாரண இந்தியப் போராளியிடம் மன்னிப்புக் கேட்ட சர்வாதிகாரி ஹிட்லர், காந்தியடிகளுக்கு நோபல் பரிசு வழங்கப்படாததற்கு என்ன காரணம்? என்பன போன்ற பல அரிய, அறியாத தகவல்களும் இடம் பெற்றுள்ள உண்மையான சிந்தனைக் களஞ்சியம்.

நன்றி: தினமணி, 24/2/2015.

துளு நாட்டு வரலாறு, மயிலை சீனி. வேங்கடசாமி, நியூ செஞ்சுரி புக் ஹவுஸ் (பி) லிட், சென்னை, பக். 108, விலை 75ரூ.

பண்டைய தமிழக வரலாற்றைப் போலவே துளு நாட்டு வரலாறும் சங்க இலக்கியங்கள் மூலம் படம்பிடித்துக் காட்டப்பட்டுள்ளது.

தற்போதைய தென் கன்னடத்தை துளு நாடாகக் காட்ட நூலாசிரியர் எடுத்துக்காட்டும் சங்க இலக்கியப் பாடல்களின் சான்றுகள் இப்போதும் மிகவும் பொருந்தக்கூடியவையாக இருக்கின்றன.

துளு நாட்டின் பெயரை மாமூலனார் தனது பாடலில் குறிப்பிடுவதைச் சுட்டிக் காட்டும் நூலாசிரியர், அதைப் பல பாடல்களின் மூலம் உறுதிப்படுத்துகிறார். அந்நாட்டின் முக்கிய ஊர்களின் பெயர்கள் சங்கப் பாடல்களில் எப்படிச் சொல்லப்பட்டுள்ளன? அவை இப்போது எந்த பெயரில் அழைக்கப்படுகின்றன? என்று நூலாசிரியர் விளக்கியிருப்பது பாராட்டுக்குரியது.

குறிப்பாக மங்களூருவை சிலப்பதிகாரம் மூலமும் தெளிவுபடுத்தியுள்ள நூலாசிரியர், மங்களாபுரத்துக்கும் கண்ணகிக்கும் எவ்விதத் தொடர்பும் இல்லை என்பதையும் தக்க சான்றுகளோடு உறுதிப்படுத்தியுள்ளார்.

துளு நாட்டு அமைவிடம் வரைபடமாக விளக்கப்பட்டிருப்பதுடன், அந்நாட்டின் அரசர்களான நன்னன் மற்றும் அந்நாட்டை கைப்பற்றிய சேரநாட்டரசர் என்பதையும் தெளிவுபடுத்தியிருக்கிறார்.

துளு நாட்டின் வரலாறு நிலத்தின் வரலாறாக மட்டுமின்றி, தமிழின் தொன்மையை அறியும் வரலாறாகவும் இருப்பதை நூலாசிரியர் சுட்டிக்காட்டியுள்ளார்.

துளு மொழியில் பண்டைய தமிழ் சொற்கள் பல பொதிந்திருப்பதையும், அதுகுறித்த தெளிவான ஆய்வு நடத்தப்படுவது அவசியம் எனவும் அவர் வலியுறுத்தியிருக்கிறார்.

நன்றி: தினமணி, 24/2/2015.

கவி கா.மு. ஷெரீப் திரை இசைப்பாடல்கள், தொகுப்பாசிரியர் பொன்.செல்லமுத்து, மணிவாசகர் பதிப்பகம், சென்னை, பக். 96, விலை 50ரூ.

புகழ்பெற்ற கவிஞர்களின் திரையிசைப் பாடல்களை ஆண்டு வரிசைப்படி தொடர்ந்து தொகுத்துவரும் தொகுப்பாசிரியர் கவிஞர் பொன்.செல்லமுத்து இம்முறை தொகுத்தளித்திருக்கும் நூல் கவி கா. மு. ஷெரீப் திரை இசைப்பாடல்கள்.

கவி. கா. மு. ஷெரீப் 1949 முதல் 1963 வரை 14 ஆண்டுகளில் 30 படங்களில் 90 பாடல்கள் எழுதியுள்ளார். கா. மு. ஷெரீப்பின் வாழ்க்கை வரலாற்றுக் குறிப்பும் இடம் பெற்றுள்ளது.

பணம் பந்தியிலே குணம் குப்பையிலே, வாழ்ந்தாலும் ஏசும் தாழ்ந்தாலும் ஏசும், சிட்டுக்குருவி சிட்டுக்குருவி சேதி தெரியுமா? முதலிய கவிஞரின் பிரபலமான பாடல்கள் இடம்பெற்ற படங்கள், படம் வெளிவந்த ஆண்டு, படத்தை இயக்கிய இயக்குநர், பாடலுக்கு இசையமைத்த இசையமைப்பாளர், பின்னணி பாடியவர்கள் போன்ற எல்லா விவரங்களையும் இந்நூலிலிருந்து அறிந்துகொள்ள முடிகிறது.

படங்கள், பாடல்கள் அகரவரிசை பட்டியலும் உண்டு. திரையிசை ரசிகர்கள் படித்துப் பாதுகாக்க வேண்டிய நூல் இது.

நன்றி: தினமணி, 24/2/2015.

மின்புறா கவிதைகள், சீராளன் ஜெயந்தன், மெய்ப்பொருள் வெளியீடு, சென்னை, விலை 180ரூ.

காலம்தோறும் தன்னைப் புதுப்பித்துக் கொள்ள, வாழ்வனுபவம் சார்ந்து வெளிப்படுத்தப்படும் படைப்புகளையே தமிழ்க் கவிதையும் நம்பியிருக்கிறது. சீராளன் ஜெயந்தனின் ‘மின்புறா கவிதைகள்’ நூலில் ஒரு குறுங்காவியம் உட்பட 56 கவிதைகள் இடம்பெற்றிருக்கின்றன.

தமிழ் வாழ்வின் அன்றாடப்பாடுகளை, அரசியலை, அதிவேகப் பாய்ச்சல் காட்டும் நவீன அறிவியலையும் கூட உள்வாங்கிப் பிரதிபலிக்கும் கவிதைகளாக இருக்கின்றன.

எளிமை தனக்கே உரிய கம்பீரத்துடன் ஊடாடும் மொழியில் முதல் வாசிப்பிலேயே நம்முடன் நேரடியாக உறவாடக் கூடியவை இந்தக் கவிதைகள்.

“முதுகில் உருண்டு
நதியில் விழுந்தது கலயம்
சாம்பலாய் கரைந்தார்
கையில் தாங்கி
நீந்தச் சொன்ன தந்தை”

-என்ற கவிதை, உலகை நீத்த தந்தைக்கு இறுதிக் கடன் செய்து அஞ்சலியைச் செலுத்துவதைப் பேசும் அதே நேரம், இதே தண்ணீரில் தனக்கு நீச்சல் பழகச் செய்த நினைவுகளையும் அலையாட வைத்துவிடுகிறது.

சீராளன் ஜெயந்தனின் தந்தையான ஜெயந்தன் சிறுகதைகள் மற்றும் நாடகத்தில் குறிப்பிடத் தக்க தடங்களை விட்டுச்சென்றவர். இவர் கவிதை வடிவத்தை விரும்பி எடுத்துக்கொண்டிருக்கிறார்.

முதல் தொகுப்பில் அரும்பி நிற்கும் கவிதைகள், உணர்ச்சிகளைக் கட்டுக்குள் வைத்துக்கொண்டு வெளிப்பட்டிருப்பதே அசலான தேர்ச்சியாக இருக்கிறது.

-சொல்லாளன்.

நன்றி: தமிழ் இந்து, 28/2/2015.

படித்ததும் பிடித்ததும், உதயை மு. வீரையன், மணிவாசகர் பதிப்பகம், சென்னை, பக். 256, விலை 125ரூ.

வாசிப்பின் மீது வாஞ்சை

கால ஓட்டத்திற்கேற்ப தன்னைப் புதுப்பித்துக்கொள்ள புத்தகங்களை வாசிப்பது வாசகருக்கு மட்டுமல்ல, படைப்பாளருக்கும் அவசியமான ஒன்றே.

வாசிப்பென்பது அனைவருக்கும் பொதுவென்றாலும், புத்தக வாசிப்பின் வழியே ஒரு வாசகர் அடைந்த அனுபவம் அவருக்குள்ளேயே தங்கிவிடுகிறது. ஒ

ரு படைப்பாளியோ தனக்குள் அந்தப் புத்தகம் ஏற்படுத்திய தாக்கத்தை மீண்டும் வாசகருக்கே அனுபவக் கடத்தியாய்த் திருப்பியனுப்பும் வேலையைச் செய்துவிடுகிறார். அப்படியான எழுத்துக்களின் பதிவே உதயை மு. வீரையனின் ‘படித்ததும் பிடித்ததும்’.

தான் படித்த புத்தகங்களில் மிகவும் பிடித்த புத்தகங்களைப் பற்றி வாசகர்களும் அறிந்துகொள்ளும் நோக்கில், ‘தமிழ்த் தென்றல்’ இதழில் உதயை மு. வீரையயன் எழுதிய கட்டுரைகளின் தொகுப்பு இது.

கவிதை, கட்டுரை, சிறுகதை, மொழிபெயர்ப்பு என்று பல்வேறு வகைகளில் 48 புத்தகங்களைப் பற்றி எழுதப்பட்ட இந்தக் கட்டுரைகள், வாசகருக்கு அந்த நூல்களை வாஞ்சையுடன் அறிமுகம் செய்துவைக்கின்றன.

நூல்களைத் தேடிப் படிக்கும் ஆவலைத் தூண்டுவதாகவும் இருப்பதே நூலாசிரியரின் எழுத்துக்குக் கிடைத்த வெற்றிதானே.

-மு. முருகேஷ்,

நன்றி: தமிழ் இந்து, 28/2/2015.

சத்யஜித் ரே, திரைமொழியும் கதைக்களமும், பிரக்ஞை பதிப்பகம், சென்னை, விலை 225ரூ.

அறிந்துகொள்ளலாம் சத்யஜித் ரேயை

இந்திய எதார்த்தத்தை முதல்முறையாக செல்லுலாய்டில் பிடித்த திரைக்கலைஞர் சத்யஜித் ரே. வணிக சினிமாவுக்கு மாற்றாகத் தமிழகம் உள்ளிட்ட அனைத்து மாநிலங்களிலும் தொடர்ந்து நடக்கும் திரைப்பட முயற்சிகளுக்குத் தூண்டுதலைத் தருபவராக மறைந்த பிறகும் சத்யஜித் ரேயின் படைப்புகள் இருந்துவருகின்றன.

தமிழகத்தின் தலைநகர் சென்னையில் வாழ்ந்து மறைந்த நடன ஆளுமை பால சரஸ்வதி குறித்துக் கலாபூர்வமான ஆவணப்படத்தை எடுத்தவர் என்ற வகையில் தமிழகத்தோடும் தொடர்புகொண்டவர் ரே.

சத்யஜித் ரே என்னும் ஆளுமையின் கலைமரபு, குடும்ப, தொழில் பின்னணி முதல் அவரிடம் சிறப்பாக சிலாகிக்கப்படும் இசைஞானம் வரை முழுமையாக அறிமுகப்படுத்தும் நூல் இது. ரேயின் சினிமா வாழ்வை அறிந்துகொள்ள இந்நூலில் இடம்பெற்றுள்ள த்ரித்ததிமன் சாட்டர்ஜி எடுத்த நேர்காணல் இந்நூலில் மொழிபெயர்க்கப்பட்டுள்ளது.

பதேர் பாஞ்சாலி தொடங்கி அவரது அரசியல் பார்வைகள் உட்பட பல விஷயங்களை இந்த நேர்காணலில் பகிர்ந்துகொள்கிறார் ரே. பால சரஸ்வதியைப் படம்பிடிக்கும்போது, அவரது நடனத்தில் ஆக்கிரமிக்கப்பட்டு செயலிழந்த ஒரு தருணத்தைப் பற்றி இப்படிக் குறிப்பிடுகிறார்.

“என்னுடைய ஒளிப்பதிவுக் கருவி படமெடுத்துக்கொண்டிருப்பது தன்னுடைய கலைத் திறனின் உச்சகட்ட பரவசத்தில் ஆழ்ந்திருந்த பாலாவை என்ற எண்ணம் என்னை ஆனந்தத்தில் ஆழ்த்தியது”.

அரிய புகைப்படங்களைக் கொண்டிருக்கும் இந்த நூலை பிரக்ஞை பதிப்பகம் வெளியிட்டுள்ளது. லதா ராதாகிருஷ்ணன் மொழிபெயர்த்திருக்கிறார்.

-வினுபவித்ரா.

நன்றி: தமிழ் இந்து, 21/2/2015.

இங்கே எதற்காக?, இயக்குநர் ஜெயபாரதி, டிஸ்கவரி புக் பேலஸ் பி.லிட், சென்னை, விலை 150ரூ.

உதாசீனங்களே சன்மானமாய்

வெற்றி பெற்றவர்களின் வரலாறு எளிதில் பரவிவிடும். அதற்குப் பெரும் எத்தனிப்புகள் அவசியமல்ல. ஆனால் வெற்றிபெறும் வரை அவர்கள் எதிர்கொள்ளும் சவால்களும் போராட்டங்களும் அவஸ்தையானவை.

வெற்றிக்கும் மரியாதையும் தோல்விக்கு உதாசீனமுமே சன்மானங்கள். இந்த மாயம் புரிபடாதபோதும் படைப்பின் மீது கொண்ட தீராத காதலால் பல ஆளுமைகள் திரையென்னும் சுழலுக்குள் சிக்கிச் சுழல்கிறார்கள்.

அப்படியொரு ஆளுமை ஜெயபாரதி. தீவிரமான தமிழ் திரைப்படங்களில் ஈடுபாடு கொண்ட ஜெயபாரதி என்னும் பெயர் தமிழ் பார்வையாளர்களுக்கு ஓரளவு பரிச்சயமானதே. ஆனாலும் அவரது குடிசை, உச்சிவெயில், நண்பா நண்பா போன்ற படங்களைப் பற்றித் தெரிந்திருக்கும் அளவுக்கு அவரைப் பற்றி அறிந்திருப்போமா என்பது சந்தேகமே.

ஜெயபாரதி என்னும் இயக்குநரின் வாழ்க்கைச் சம்பவங்களின் தொகுப்பை ‘இங்கே எதற்காக?’ என்னும் பெயரில் நூலாக அவரே எழுதியுள்ளார். பத்திரிகையாளர், இயக்குநர், நடிகர் என்ற பல்வேறு பணிகள் காரணமாக நாம் அறிந்த எத்தனையோ ஆளுமைகளை அவர் எதிர்கொண்டுள்ளார்.அவர்களின் மற்றொரு பக்கத்தைக் கிண்டலாகவும் கேலியாகவும் ஆழமான மனஉளைச்சல் தொனிக்கப் பகிர்ந்துள்ளார்.

இறந்தவர்களைப் பற்றி தான் அறிந்த மாறுபாடான தகவல்களைத் தெரிவிக்க ஜெயபாரதி தயங்கவே இல்லை. தான் சந்தித்த பல ஆளுமைகள் குறித்த தகவல்களை அவர் தெரிவிக்கும்போது நமக்கு அதிர்ச்சி ஏற்படும்போதும் அவற்றின் நம்பகத் தன்மை பற்றிய சந்தேகங்களும் எழாமல் இல்லை. ஆனாலும், நூலை வாசிப்பதற்கு இது தடைக்கல்லாக அமையவில்லை.

-ரிஷி.

நன்றி: தமிழ் இந்து, 21/2/2015.

தென் ஆப்பிரிக்கா பயண அனுபவங்கள், கலைமாமணி யோகா, யோகா சாவித் பப்ளிகேஷன்ஸ், சென்னை, விலை 150ரூ.

நட்பின் பெருமை பேசும் ஒரு பயண நூல்

தென் ஆப்பிரிக்கப் பயண அனுபவங்கள் என்று தலைப்பிட்டிருந்தாலும் இந்த வித்தியாசமான நூலில் நீண்ட கலமாக நிலவிவருகிற நட்பின் பெருமையை நினைவு கூர்கிற பகுதிகள் அதிகம்.

1970, 1990 ஆண்டுகளில் அறிமுகமான நண்பர்களை 2011, 12 ஆண்டுகளிலும் அதே பாசத்துடன் சந்திப்பது என்பது அதிகம் பேருக்குக் கிடைக்க முடியாத பேறு. அப்படிப்பட்ட அரிய வாய்ப்புகளைப் பெற்றதோடு அந்த நினைவுகளைப் படப்பதிவுகளாகவும் செய்து இத்தொகுப்பில் சேர்த்திருப்பது யோகாவைத் தவிர வேறு யாருக்கும் சாத்தியமில்லாத ஒன்று.

திரைப்படப் பிரமுகர்கள் பலரைச் சந்தித்துப் பேட்டி கண்டு தென் ஆப்பிரிக்க பத்திரிகைகளில் வெளியிட்ட ஷான் பிள்ளையோடும் மற்றவர்களோடும் ஆசிரியர் கொண்ட நட்பின் ஆழம் உயர்வானது. காலவெள்ளத்தில் சிலர் பொருளாதார நிலையில் தாழ்வு நிலை அடைய நேர்ந்தபோதிலும் அவர்களை மறவாமல் சந்தித்து மரியாதை காட்டியதைச் சொல்லும் பகுதிகள் படிப்போரை நெகிழச்செய்யும்.

தென் ஆப்பிரிக்காவில் சுவாமி சிவானந்தாவின் சீடர் ஒருவர் அவருக்காக நிறுவியுள்ள ஆசிரமத்தையும் பிரார்த்தனைக் கூடத்தின் எதிரேயுள்ள திருக்குளத்தில் நம்முடைய பாரதத்தின் பெருமைக்குரிய கங்கை நதியிலிருந்து கொண்டுபோன பவித்திரமான நீரைச் சேர்த்துப் புனிதப்படுத்திப் பாதுகாக்கிறார்கள் என்பது பலரும் அறிந்துகொள்ள வேண்டிய செய்தி.

பீட்டர் மாரிஸ்பர்க் ரெயில் நிலையத்தில் அவமானப்படுத்தப்பட்ட நம்முடைய தேசப்பிதா காந்தியடிகள் தங்க வைக்கப்பட்ட அறையைப் பாதுகாக்கிறார்கள். அங்கு தென் ஆப்பிரிக்கப் புரட்சிவீரர் நெல்சன்மண்டேலா திறந்துவைத்த பாபுஜியின் உருவச்சிலை பற்றிய விவரங்களையும் ஆசிரியர் இந்த நூலில் தந்துள்ளார்.

-சுப்ர. பாலன்.

நன்றி; கல்கி, 8/3/205

இங்கே நிம்மதி, என். கணேசன், பிளாக்ஹோல்மீடியா, சென்னை, பக். 160, விலை 130ரூ.

ஆழ்மன சக்தி, ஆன்மிகம், சுயமுன்னேற்றம், வாழ்வியல், நாவல்கள், சிறுகதைகள் என்று இவரது படைப்புகள் முக்கியத்துவம் பெற்றவை. இவற்றில் சில இலக்கியச் சிந்தனை உட்பட பல பரிசுகளைப் பெற்றுள்ளவை.

அந்த வகையில் இந்நூலில், ஏழைகள் முதல் பணக்காரர்கள் வரை அனைத்துத் தரப்பினருக்கும் வரும் எல்லாப் பிரச்னைகளையும், சுமார் 42 கட்டுரைகளில் பிரித்துக் காட்டி, இவற்றுக்கு தீர்வு காண்பது எப்படி என்பதையும் மிக எளிமையாக விளக்கியுள்ளார் ஆசிரியர்.

முல்லா, ஜென், புராண சம்பவங்கள்… போன்ற குட்டிக் கதைகள் மூலமாகவும், பிரபலஸ்தர்கள் சிலரின் வாழ்க்கையில் நிகழ்ந்த சம்பவங்கள் மூலமாகவும் யதார்த்தத்தை விளக்கி, பிரச்னைகளுக்கான முடிச்சுகளை அவிழ்த்து காட்டுகிறார் ஆசிரியர்.

ஒருமுறை தான் மதிக்கும் குள்ளச்சாமி என்ற சித்தர், அழுக்கு மூட்டை ஒன்றை முதுகில் சுமந்தபடி வருவதைக் கண்ட மகாகவி பாரதியார், பதறிப் போய் ‘ஐயா, ஏனிந்த கோலம்?’ என்று கேட்க, ‘நான் குப்பைகளை வெளியே சுமந்து கொண்டிருக்கிறேன். நீ உள்ளே சுமந்து கொண்டிருக்கிறாய்’ என்று கூறிச் சென்றது, பாரதியை மிகவும் சிந்திக்க வைத்தது.

இது நம்மையும் சிந்திக்க வைக்கும் ஒரு நிகழ்ச்சி என்று கூறி, நம் மனதில் உள்ள துக்க சுமைகளை களையும் வழிமுறைகளை ஒரு கட்டுரையில் ஆசிரியர் விளக்கியுள்ளது மனதைத் தொடுகிறது. இப்படி இந்நூலிலுள்ள அனைத்து கட்டுரைகளுமே படிப்பவர்களுக்கு தன்னம்பிக்கையையும், புத்துணர்வையும் ஏற்படுத்துகின்றன.

-பரக்கத்.

நன்றி: துக்ளக், 4/3/2015.

சங்ககாலக் கொற்கைப் பாண்டியர் வெளியிட்ட செழிய செழியன் நாணயங்கள், இரா. கிருஷ்ணமூர்த்தி, கார்னெட் பப்ளிஷர்ஸ், சென்னை, விலை 400ரூ.

4-5 மி.மீ. குறுக்களவுள்ள கோள வடிவிலான ‘நாணயங்கள்’ சிலவற்றைப் பற்றிய விவரங்களைப் படிக்கும்போது வியப்பாக இருக்கிறது. இவற்றின் எடை கூட ஒரு கிராமில் ஆறில் ஒரு பங்குக்கும் சற்றே கூடுதலாகத்தான் இருந்திருக்கிறது.

4மி.மீ. என்பது சராசரியான ஒரு நெல்மணியின் நீளம்தான் இருக்கும். கி.மு. மூன்றாம் நூற்றாண்டு வாக்கிலேயே தமிழகத்தில் இப்படிப்பட்ட நாணயங்களை உருவாக்கி இருக்கிறார்கள்.

சின்னஞ்சிறியதாக இந்த மாதிரி ஒரு பொருள் நதிப்படுகைகள் போன்ற இடங்களில் தேடியிருந்தால் நம் கைகளிலும் கிடைத்திருக்கும்தான். ஆனால் இவற்றை நாணயங்கள் என்று இனம்கண்டு சொல்கிற ஆற்றல் உள்ளவர்கள் லட்சத்தில் ஒருவராது இருப்பார்களா என்பது சந்தேகமே. அப்படிப்பட்ட ஆற்றலுள்ள வெகு சிலருள் ஒருவர் நாணவியல் அறிஞராகப் புகழ்பெற்று விளங்குகிற (தினமலர்) இரா. கிருஷ்ணமூர்த்தி.

முப்பதாண்டு காலத்துக்கும் மேலாகப் பாத்திரக் கடைகளிலும் பல்வேறு இடங்களிலும் தேடித் தேடிச் சேகரித்த தொல்பொருள் சான்றுகளான இந்த நாணயங்களை இவரால் உடனே இனங்கண்டறிய முடிந்ததில்லை. இருபது ஆண்டுகளுக்கு முன்னால் திருநெல்வேலியில் நெல்லையப்பர் கோயில் அருகிலிருந்த ஒரு சிறிய பாத்திரக் கடையில் இரண்டு கிலோ பழைய நாணயங்களை வாங்கினாராம். அவை பெரும்பாலும் தாமிரபரணி ஆற்றில் கிடைத்தவையாம்.

நீண்ட காலமாக ஆற்றில் கிடந்தமையால் அவை உருத்தெரியாமல் புளியங்கொட்டை வடிவத்தில், அதே நிறத்தில் இருந்திருக்கின்றன. அவற்றை அப்படியே ஒரு கண்ணாடிக் குவளையில்போட்டு மூடிவைத்துவிட்டாராம். இரண்டு ஆண்டுகளுக்கு முன்னால் அவற்றை எடுத்துப் பலமுறை சுத்தம் செய்தபோது அதில் பதிந்திருந்த சில குறியீடுகள் கண்ணுக்குத் தெரிந்திருக்கின்றன.

இன்னும் பல மாதங்கள் முயன்றதில் அவற்றில் யானை போன்ற உருவங்களும் தமிழ் பிராமி எழுத்து வடிவத்தில் ‘செழிய’ என்ற பெயர்ப்பதிவும் தெரிய வந்தனவாம். இந்த அடிப்படையில் நூற்றுக்கணக்கான ‘நாணயங்களை’ ஆய்வு செய்து அவற்றைப் பற்றிய விளக்கங்களை, நாணயங்களின் வண்ணப் படங்களோடும் தொகுத்து வரலாற்று ஆய்வாளர்களுக்குப் பெரிதும் பயன்படத்தக்க வகையில் இப்போது அரிய நூலாக வெளியிட்டிருக்கிறார்கள்.

படவிளக்கங்களைத் தவிர வரலாற்றுச் செய்திகள் பலவற்றை உள்ளடக்கிய கட்டுரைகளும் இடம்பெற்றள்ளன. மதுரைப் பாண்டியர்களைப் போலவே, கொற்கையை ஆண்ட பாண்டியர்களைப் போலவே, கொற்கையை ஆண்ட பாண்டியர்களும் சங்ககாலத்தில் பெரும் செல்வாக்கோடு விளங்கி நாணயங்களை உருவாக்கியிருக்கிறார்கள்.

இருவகை நாணயங்களின் வேறுபாட்டையும் ஆராய்ந்து இரண்டுக்கும் தொடர்பில்லை என்றும் கருத்துத் தெரிவித்துள்ளார் ஆசிரியர். பெயர் பொறிக்கப்பட்ட சங்ககால நாணயம் எதுபும் 1984ஆம் ஆண்டு வரை கிடைத்ததில்லையாம்.

அந்த ஆண்டில் ஆசிரியர் கண்டறிந்து வெளியிட்டது ‘பெருவழுதி’ என்று பெயர் பொறித்த மதுரைப் பாண்டியர் காலத்து நாணயங்களைப் பற்றிய விவரங்களை. இப்போது வெளியாகியிருப்பது ‘சங்ககாலக் கொற்கைப் பாண்டியர் வெளியிட்ட செழிய, செழியன் நாணயங்கள்” என்னும் தலைப்பிலான நூல்.

இந்தக் கொற்கைப் பாண்டியர்கள் ஆமுண்ட நிலப்பகுதி ‘தாம்ரபர்னி’ என்று வழங்கப்பட்டது பற்றிய ஒரு கட்டுரையும் சுவையானது. வரலாற்று ஆர்வமுடைய அனைவருமே விழி விரியப் படிக்கக்கூடிய நல்ல நூல் இது.

-சுப்ர. பாலன்.

நன்றி: கல்கி, 1/3/2015.

காந்தியத் தாயத்து, முனைவர் சுந்தர ஆவுடையப்பன், நேசம் பதிப்பகம், பக். 136, விலை 90ரூ.

காந்தியடிகளின் வாழ்க்கையை மக்கள் மனதில் எளிதில் பதிவு செய்ய முனைவர் ஆவுடையப்பன் எடுத்திருக்கும் உத்தி இது.

ஒரு நிகழ்வைச் சொல்லி அதற்கு விளக்கம் அளிக்கும் விதமாக காந்தியடிகளின் வாழ்வில் நடந்த சம்பவத்தை பொருத்தி விடுகிறார். அதை அந்த உரையாடல் மூலம் நிறைவு செய்வதால் படிப்போர் மனதில் எளிதில் காந்தியின் கொள்கைகள் வந்து உட்கார்ந்துவிடுகின்றன.

அகிம்சை, சத்தியம், அன்பு, சகிப்புத்தன்மை, சத்தியாகிரகம் போன்றவற்றை காந்தி எப்படி தன் வாழ்வின் நெறிமுறைகளாகக் கொண்டு வாழ்ந்து காட்டினார் என்பதை தெளிவாகப் புரியவைத்துவிடுகிறார்.

காந்தியின் தொண்டு, மக்களுக்காக காந்தி நடத்தி போராட்டங்கள், அதற்காக அவர் பட்ட அவமானங்கள், தவறு செய்தோரை மன்னிக்கும் மாண்பு, பிரிட்டிஷ் ஆட்சி பற்றிய விவரணை, காந்தி அடைந்த வெற்றி, அவர் மக்களுக்கு போதிக்கும் கொள்கைகள் – இவையெல்லாம் அடங்கியதுதான் காந்தியத் தாயத்து என்று நம்மை காந்தியின் கொள்கைகளைக் கொண்டே கட்டிப்போட்டுவிடுகிறார் ஆசிரியர்.

சிறுவர்களும் படிக்கும்படியான எளிய நடை. கூடுதல் பலம்.

நன்றி: குமுதம், 23/2/2015.

கவியமுதம், கவிஞர் இரா. இரவி, வானதி பதிப்பகம், சென்னை, பக். 172, விலை 100ரூ.

கவிஞர் இரா. இரவியின் கவிதைகள் ஒவ்வொன்றிலிருந்தும் தமிழின்-தமிழனின் உயிர்த் துடிப்பு கேட்கிறது. சமூக அவலங்களை எதிர்க்கும் ஒரு கலகக்குரல் கேட்கிறது. மொழியின் ஆன்மா தெரிகிறது. முற்போக்குச் சிந்தனையின் முகவரி தெரிகிறது. சமரசம் செய்து கொள்ளாத கொள்கை தெரிகிறது.

காமராசரையும் பெரியாரையும் பாரதிதாசனையும் இன்னும் பல அறிஞர்களை அடுத்த தலைமுறைக்கு எடுத்துச் செல்லும் உழைப்பு தெரிகிறது. எதிர்காலம் குறித்த நம்பிக்கை விதையை விதைக்கும்போக்கு தெரிகிறது. காதலின் வலிமையும் மேன்மையும் தெரிகிறது. மொத்தத்தில் கவிதைகள் அனைத்திலும் கவிஞனின் உள்ளம் தெரிகிறது.

நன்றி: குமுதம், 23/2/2015.

—-

சின்னச் சின்ன பொது அறிவு, சி. இலிங்க தமிழ்மொழி (தொகு.), சுபா பதிப்பகம், சென்னை, பக். 160, விலை 100ரூ.

சிறுவர்களுக்கான பொது அறிவை வளர்க்கவும் பெரியவர்களின் பொது அறிவை நினைவுக்குக் கொண்டு வரும்விதமாகவும் ஏராளமான பொது அறிவுச் செய்திகளை அள்ளித் தந்துள்ளார்கள்.

சின்னஞ் சிறிய உயிரினங்கள் முதல் உலகை முதன்முதலாக வலம் வந்த கப்பல் வரை பல செய்திகள் இதில் உள்ளன. கணிதமேதை ராமானுஜன் முதல் மர்லின் மன்றோவின் நினைவு தினம் வரை உலகச் செய்திகளை திகட்டத் திகட்ட தந்துள்ள நூல்.

நன்றி: குமுதம், 23/2/2015.

நீதிக்கட்சி வரலாறு (1616-1944), க. திருநாவுக்கரசு, நக்கீரன் வெளியீடு, விலை 1200ரூ.

நூற்றாண்டு விழாவை நெருங்கிகொண்டு இருக்கும் திராவிட இயக்கத்தின் முதல் 30 ஆண்டு கால முழுமையான வரலாறு இது.

திராவிடர் இயக்க வரலாற்றுக் கணினி என்று பாராட்டப்பட்ட க. திருநாவுக்கரசு தனது அதீதமான உழைப்பால் இதை உருவாக்கியிருக்கிறார். அடுத்து சுயமரியாதை இயக்கம், திராவிடர் கழகம், திராவிட முன்னேற்றக் கழகம் ஆகியவற்றின் முழுமையான வரலாற்றையும் அவர் பரபரப்பாய் எழுதி வருகிறார்.

பலரது கூட்டுமுயற்சியால் உருவாக்கப்பட வேண்டிய, பெரிய உழைப்பு தேவைப்படும் ஒரு பணியை தனி மனிதராய் இருந்து செயல்படுத்தும் திறமை கொண்ட வரலாற்று ஆசிரியர்களில் முக்கியமானவர் க. திருநாவுக்கரசு.

நீதிக்கட்சி என்று பேச்சு வழக்கில் அழைக்கப்பட்டாலும் 1916ம் ஆண்டு தொடங்கப்பட்ட இயக்கத்தின் பெயர், ‘தென்னிந்திய நல உரிமைச் சங்கம்’.

பிரிட்டிஷ் ஆட்சியாளர்களிடம் அடிமைப்பட்டுக் கிடந்த இந்தியா தனது அரசியல் விடுதலைக்கான போராட்டத்தில் இருந்தபோது, சமூக விடுதலைக்காக இந்த அமைப்பு தொடங்கப்பட்டது.

‘நாட்டின் 90 சதவிகிதத்துக்கும் மேற்பட்டவர்களை ஒடுக்கி வைத்திருக்கும் ஒரு நாட்டுக்கு அரசியல் விடுதலை தரப்பட்டால், அது மேல்தட்டு வர்க்கத்தினருக்கு மட்டுமே பயன்படும்’ என்று சொல்லி சமூக விடுதலையை முன்னெடுத்த அமைப்பு இது.

நாட்டில் நடந்த முதல் பொதுத்தேர்வில் (1920-ம் ஆண்டு) நீதிக்கட்சி சென்னை ராஜதானியில் ஆட்சியைக் கைப்பற்றி செய்த பல்வேறு சீர்திருத்தங்கள் மலைப்பைத் தருகின்றன. அந்தக் கட்சியே தொடர்ந்து இரண்டு மூன்று தேர்தல்களில் வென்றது. தொடர்ச்சியாக ஆட்சியை வைத்திருந்தால், நன்மையைப் போலவே எதிர்மறையான விளைவுகளும் அதிகமாக இருக்கத்தானே செய்யும்.

பதவியை விட்டுத்தரத் தயாராக இல்லாத மனிதர்கள் சிலர் இதன் முக்கியஸ்தர்களாக மாறியபோது, 1935-ம் ஆண்டு பெரியார் ஈ.வே.ரா. இதன் தலைவராக ஆகிறார். அதில் இருந்து இந்தக் கட்சிக்கு மீண்டும் ஓர் உற்சாகம் கிடைக்கிறது. ஆனாலும் திருந்தாத சிலரை விலக்கி வைத்துவிட்டு, மற்றவர்களின் துணையுடன் 1944ல் சேலம் மாநாட்டில் தொடங்கப்பட்டதுதான் திராவிடர் கழகம். இந்த வரலாற்றுக்களைச் செறிவுடன் கொடுத்துள்ளார் க. திருநாவுக்கரசு.

ஒரு வரலாற்றுப் புத்தகத்துக்கானத் தொடர்ச்சியான தகவல்களும் அந்த நிகழ்வுகளுக்கான காரணத்தைச் சொல்வதற்கான விளக்கங்களும் விவாதம் தேவையான இடங்களில் விமர்சனங்க்ளும்… என பல்வேறு பரிமாணங்கள் கொண்டதாக இந்தப் புத்தகம் இருக்கிறது. இந்தக் காலகட்டத்திற்கு அவசியமான வரலாறு இது.

-புத்தகன்.

நன்றி: ஜுனியர் விகடன், 1/4/2015.

காலத்தை வென்ற காவிய நட்பு, பழ. நெடுமாறன், நியூ செஞ்சுரி புக் ஹவுஸ், விலை 800ரூ.

ஆசிரியர் பழ. நெடுமாறனின் கடும் முயற்சியாலும் அர்ப்பணிப்பாலும் இந்த புத்தகம் உருவாகி இருப்பதை நன்றாக உணரமுடிகிறது.

இந்தியாவுக்கும், ரஷியாவுக்கும் ஆதிகாலத்தில் இருந்து வரும் நட்பும் இரு நாடுகள் இடையே ஏற்பட்ட பண்பாட்டு பரிமாற்றமும் மிக நுணுக்கமாக இந்த நூலில் பதிவு செய்யப்பட்டுள்ளன.

இந்தியாவின் சுதந்திர போராட்டத்திற்கு ரஷியா செய்த உதவிகள், ரஷியாவில் நடைபெற்ற புரட்சி இந்தியாவில் ஏற்படுத்திய தாக்கம், இரு நாட்டு தலைவர்களுக்கும் இடையே இருந்த ஆழ்ந்த நட்பு போன்றவை பற்றிய வியக்கத்தக்க பல தகவல்கள் ஆதாரங்களுடன் தரப்பட்டுள்ளன.

இவை அனைத்தையும் கோர்வைப்படுத்தி கொடுத்து இருக்கும் நேர்த்தியால், விறுவிறுப்பு குறையாமல் படிக்க முடிகிறது. இந்திய – ரஷிய உறவு பற்றி முழுமையாகத் தெரிந்துகொள்ள உதவும் ஆவணமாக இந்த நூல் திகழும்.

நன்றி: தினத்தந்தி, 25/2/2015.

—-

மறுபடியும், கனகராஜன்,  எதிர்வெளியீடு, பொள்ளாச்சி, விலை 70ரூ.

அன்றாட வாழ்வியல் சம்பவங்களை கதைக்களமாக கொண்டு நூலாசிரியர் கனகராஜன் எழுதியிருக்கும் 13 சிறுகதைகளின் தொகுப்பு நூல்.

நன்றி: தினத்தந்தி, 25/2/2015.

அறிந்தும் அறியாமலும், வானவில் வெளியீடு, சென்னை, விலை 190ரூ.

பேராசிரியரும், சொற்பொழிவாளருமான சுப. வீரபாண்டியன் எழுதி இணைய தளத்தில் 33 வாரங்கள் வெளியான தொடர், அறிந்தும் அறியாமலும் என்ற தலைப்பில் நூலாக வெளிவந்துள்ளது.

இன்றைய நம் இளைஞர்களின் கணிப்பொறி அறிவும், தொழில் நுட்ப அறிவும் நம்மை வியக்கவைக்கின்றன. இத்தகைய இளைஞர்களி இலக்கியம், தத்துவம், அரசியல் போன்ற துறைகளைப் பற்றி சிறிதும் அறியாமல் இருக்கிறார்கள். இதற்கு ஒரு தலைமுறை இடைவெளியே காரணம் என்று கூறும் ஆசிரியர், முதியவர்களின் பட்டறிவும், இளைஞர்களின் செயல் திறனும் இணையும் புள்ளியில் அதிசயம் பிறக்கும் என்று அதற்கு விடையும் காண்கிறார்.

இளைய தலைமுறையினர் அவசியம் படிக்க வேண்டிய நூல்.

நன்றி: தினத்தந்தி, 25/2/2015.

—-

ஸ்ரீபரப்பிரம்ம ரகசியம், வி.என். கஜேந்திரகுருஜி, ஸ்ரீபரப்பிரம்மம் ஐந்தியல் ஆய்வு மையம், சென்னை, விலை 800ரூ.

இந்திய பண்பாடு, இறைநெறி ஆகியவற்றை இந்தியாவில் உள்ள அனைத்து தரப்பினரும் மற்றும் வெளிநாட்டவரும் தெளிவாக புரிந்துகொள்ள வேண்டும் என்ற நோக்கில் எழுதப்பட்டுள்ள இந்த நூலில், தத்துவ விளக்கங்கள் உள்பட ஏராளமான தகவல்கள் கொட்டிக்கிடக்கின்றன.

ஆன்மிக செய்திகள், புராண வரலாறுகள், வழிகாட்டுக்குரிய மந்திரங்கள், வழிபாட்டு முறைகள், புண்ணிய தலங்கள் பற்றிய தகவல்கள் ஆகிய அனைத்தையும் உள்ளடக்கி கலைக்களஞ்சியம் போல் திகழ்கிறது. இத்துடன் இடம் பெற்றுள்ள 1077 ஆன்மிக செய்திகளின் தொகுப்பு. ஆன்மிக பட விளக்கங்கள் ஆகியவையும் அனைவரும் படித்து பயன் பெறும் வகையில் உள்ளன.

நன்றி: தினத்தந்தி, 25/2/2015.

தெய்வத்தமிழ், பேராசிரியர் இரா. மோகன், வானதி பதிப்பகம், சென்னை, விலை 100ரூ.

உலகத்தை வெறுப்பது ஆன்மிகம் அல்ல, உலகத்தை அறிந்துகொண்டு, அதற்குள் வாழ்ந்து, தங்களையும், உலகத்தையும், ஒருசேர வளர்த்துக் கொள்வதே ஆன்மிகம் என்ற குன்றக்குடி அடிகளாரின் கருத்தியலின் ஒளியில் ஆன்மாவின் – உயிரின் – தரத்தை மேம்படுத்தும் கட்டுரைகள் இந்நூலில் தொகுத்து அளிக்கப்பட்டுள்ளன.

இக்காலத்திலே மனிதன் மன அழுத்தத்திலும், கவலையிலும் சிக்கித் தவிக்கிறான். புற வளர்ச்சியில் இமாலய உச்சியைத் தொட்டிருந்தாலும், அக உலகில் மயக்கத்திலும், கலக்கத்திலும், குழப்பத்திலும், நடுக்கத்திலும் அகப்பட்டு, அல்லற்பட்டு, ஆற்றாது, அழுது புலம்புகிறான். இச்சூழலில் ஆன்மிகமே அவனுக்குக் கைகொடுக்கும்.

மனதிற்கு ஆறுதல் தரும் அருமருந்தாக விளங்கும் என்பதை பல்வேறு எடுத்துக்காட்டுகள் மூலம் விளக்குகிறார் பேராசிரியர் இரா. மோகன்.

நன்றி: தினத்தந்தி, 25/2/2015.

—-

மனமென ஒன்று உண்டா?, மணிவாசகர் பதிப்பகம், சென்னை, விலை 50ரூ.

மனிதனுக்கு உண்மையில் மனம் உண்டா? என்பதை அறிவியல் அடிப்படையில் ஆராயும் நூல். இது சிறிய நூலானாலும் ஆழ்ந்த கருத்துக்கள் அடங்கிய அரிய பெட்டகமாக ஆக்கியுள்ளார் புலவர் பா. வீரமணி.

நன்றி: தினத்தந்தி, 25/2/2015.

அன்பு நபியின் அமுத வாக்குகள், இஸ்லாமிய நிறுவனம் டிரஸ்ட், சென்னை, விலை 240ரூ.

‘திண்ணமாக நற்குணத்தின் மிக உன்னதமான நிலையில் நீர் இருக்கின்றீர்’ என்று திருமறை திருக்குர்ஆன் வசனத்திற்கு ஏற்ப நபிகள் நாயகம் (ஸல்) அவர்கள் நற்பண்புகளின் தாயகமாகத் திகழ்ந்தார்கள்.

அவர்களின் பொன் மொழிகளை, மொழிகின்ற நூல்கள் ஏராளம். இஸ்லாமிய அறிஞர் மவுலானா முகம்மத் பாரூக் கான், நபி மொழிகளைத் தொகுத்து ‘கலாமெ நுபுவ்வத் என்ற பெயரில் அரபி மொழியில் ஆறு தொகுதிகளாக அளித்துள்ளார்.

அதில் ‘ஒழுக்கவியல்’ குறித்த பொன்மொழிகள் முதல் தொகுதியாக வெளிவந்துள்ளது. இதைத் தமிழில் டி. அஜீஸ்லுத்புல்லாஹ் மொழிபெயர்த்துள்ளார்.

நபிகளாரின் அமுத வாக்குகளில் ஒழுக்கவியல் போதனைகளை மட்டும் தனியாகத் தொகுத்து அளித்திருப்பது இந்த நூலின் தனிச் சிறப்பாகும். பெருமானாரின் பொன்மொழிகளுக்கு இதயத்தைத் தொடும் வகையில் அழகான, கருத்தாழம் மிக்க விளக்கங்களை ஆசிரியர் சொல்கிறார். அதன் மூலம் நன்னடத்தையின் பக்கம் கரம் பிடித்து நம்மை அழைத்துச் சென்றார்.

நன்றி: தினத்தந்தி, 25/2/2015.

—-

முப்பருவம், எஸ்.ஏ. வேணிற்செல்வன், சாரதி பதிப்பகம், சென்னை, விலை 150ரூ.

கிராம மக்கள் வாழும் முறையை அழகாக இந்த நாவலில் படம்பிடித்துக் காட்டியதுடன், “மனிதனுக்கு கெருவம் அதிகமாப் போச்சி, அதான் பருவமே மாறிப்போச்சி” என்ற வரிகள் படிப்பவர்களை கொள்ளை கொள்கிறது.

நன்றி: தினத்தந்தி, 25/2/2015.